Reportajen David dC & Ato LC
Atu hatudu solidaridade ba situasaun humanitaria iha Myanmar Governu Timor-Leste desidi ona ajuda umanitária dolar rihun $500,000 hafoin rai-nakdoko maka’as ne’ebé akontese iha loron-sesta, 28 marsu liuba. Rai-nakdoko ne’e hamate ona ema rihun tolu resin no halo ema rihun lima resin hetan kanek ho destruisaun signifikativu iha sidade Mandalay Myanmar. Governo nia apoio humanitarian fo liu hosi mekanizmu ASEAN nian, laos ba governo junta militar.
Primeiru-Ministru (PM) Timor-Leste, kay Rala Xanana Gusmão, hato’o nasaun nia tristeza ba trajédia ne’ebe akontese iha nasaun Myanmar, hodi afirma katak, “Governu Timor-Leste sente triste tebes tanba lakon vida no destruisaun bo’ot ne’ebé kauza hosi rai-nakdoko iha ita-nia nasaun viziñu. Ho fuan tomak, ita hato’o ita-nia solidariedade no prontu atu tulun ita-nia maluk sira iha Myanmar durante iha tempu susar ida-ne’e.”
Promesa ne’e tuir desizaun husi Konsellu Ministru Timor-Leste nian hodi kontribui $500,000 iha ajuda ba vítima sira husi rai-nakdoko. Asisténsia ne’e sei kanaliza liuhosi Sentru Koordenasaun ASEAN ba Asisténsia Umanitária kona-ba Jestaun Dezastre (Sentru AHA), ne’ebé koordena resposta ba dezastre iha rejiaun ASEAN nia laran.
Vice Ministra Negosiu Estranjeiru ba Asuntu ASEAN nian, Milena Rangel, hatete katak apoio humanitarian ne’e sei hato’o liu hosi Sentru AHA no Sentru ne’e mak halo servisus diretamente iha Mynmar hodi hatutan laran diak povo Timor-Leste nian ba povu Myanmar.
“Ita la iha kapasidade atu lori rasik ita nia apoio ba Myanmar. Ita uza mekanizmu ne’ebe existe iha ASEAN, AHA Centre. Sira ativu tebes iha Myanmar hosi kedas loron dahuluk akontesementu rai nakdoko hodi fo apoio ba povu Myanmar”, Vice Ministra Rangel esplika.
Aleinde apoiu finanseiru, governu Timor-Leste haruka ona karta ofisiál ida solidariedade nian hosi Prezidente Repúblika Timor-Leste José Ramos-Horta ba Prezidente Myanmar nian, Lashi La, liuhosi Embaixada Estadus Unidus nian iha Washington. Karta ne’e hato’o kondolénsia ba lakon vida no hato’o solidariedade ho laran.
Iha sorin seluk, Prezidente Ramos-Horta haruka mós karta ida ba Liurai Maha Vajiralongkorn hosi Tailándia, hodi hato’o nia kondolénsia ba impaktu hosi rai-nakdoko ba sidadaun Tailandia sira. “Ha’u espresa ha’u nia laran-susar maka’as ba vítima sira hosi trajédia ne’e no kompaixaun hosi Timor-Leste hasoru família sira hosi afetadu sira”, hakerek hosi Ramos-Horta. “Ami fiar katak iha ita-boot nia lideransa, povu Tailándia sei hasoru dezafiu ida-ne’e ho forsa no determinasaun.”
Ida-ne’e ba dala rua ona Timor-Leste oferese ajuda ba Myanmar hodi hatán ba dezastre naturál ne’ebe akontese iha Myanmar. Iha tinan 2009, Timor-Leste fó ajuda umanitária hamutuk $500,000 hafoin siklone Nargis estraga rejiaun ne’e.
Enkuantu Timor-Leste sai hanesan apoiante konsistente ba ajuda umanitária ba Myanmar, relasaun entre nasaun rua ne’e sai tensaun dezde golpe militár 2021 ne’ebé hasai governu sivíl Myanmar nian. Timor-Leste sai vokál iha nia kondenasaun ba junta militár, no nu’udar rezultadu, Myanmar duni-sai misaun diplomátika Timor-Leste nian. Maibé ida-ne’e, Timor-Leste kontinua rekoñese Myanmar nia Governu Unidade Nasionál (NUG) no simu ona vizita oioin hosi reprezentante NUG sira iha tinan hirak ikus ne’e.