Reportajen Juvinal Cabral
Governu Japaun liuhusi nia embaixador iha Timor-Leste apoiu osan $92,590 ba konstrui edifisiu eskola foun EBCC Nossa Senhora Aitara iha Suku Manlala, Postu Administrativu Soibada, Munisípiu Manatuto.
“Ha’u haksolok tebes hodi mai selebra inaugurasaun edifísiu eskola foun iha Munisípiu Manatuto hamutuk ho Sua Exelénsia Prezidente Ramos-Horta no komunidade sira ne’ebé sei utiliza eskola ida-ne’e. Ha’u hein ho laran tomak katak eskola ida-ne’e sei sai fatin ba mehi no aspirasaun ba estudante sira, hodi fó kbiit ba sira atu foti sira nia pasu dahuluk ba sira nia futuru ne’ebé nabilan. Ami hein atu servisu hamutuk ho ita-boot sira hotu hodi apoia estudante sira no komunidade iha tinan hirak tuir mai” dehan KIMURA iha komunikandu imprensa ne’ebe Neon Metin asesu husi media embaixador Japaun.
Ba projetu ida ne’e, Governu Japaun fó USD $ 92,590 liuhosi ninia eskema apoiu finanseiru ba Projetu Baze no Seguransa Umanu (GGP). Liuhosi projetu ne’e konstrui edifísiu eskola foun ho sala-de-aula tolu (3) no sala professor ida (1) ne’ebé fó benefísiu ba estudante na’in 102 no profesór na’in 13 iha eskola Nossa Senhora Aitara.
Embaixador Japaun haktuir dezde lansa projetu dahuluk iha tinan 2000, projetu hamutuk 141 mak implementa ona tuir eskema GGP nian iha munisípiu 13 hotu iha Timor-Leste. Projetu sira prinsipálmente fó asisténsia ba infraestrutura komunitária, inklui konstrusaun no rehabilitasaun ba instalasaun eskolár sira, postu saúde sira, no Sistema abastesimentu bee mo’os, hodi hatán ba nesesidade umanu báziku oioin iha baze.
Serimónia ne’e organiza hosi Fundasaun Leobalu, ONG lokál ne’ebé mak implementa projetu ne’e Prezidente Republika Ramos Horta, Luis Inacio Hendriques Fernandes, Prezidente Autoridade Munisípiu Manatuto, ofisiál governu lokál hosi utoridade relevante sira, profesór no estudante sira hamutuk ho Embaixadór Kimura iha serimónia ne’e.
