Reportajen David da Costa
Iha Suku Labarai, Postu Administrativu Suai Villa, Munisípiu Covalima, Komunidade sira sei hasoru Problema kona-ba estrada no Saúde.
Autoridade Suku Labarai, Postu Administrativu Suai Villa, Munisípiu Covalima, Paulo de Sena, dehan, komunidade sira iha Suku Labarai infrenta ne’e primeiru estrada, saúde. Problema ne’ebe boot maka saúde tanba aimoruk laiha atu fó ba komunidade sira.
“Iha ha’u nia suku rasik ne’ebé komunidade sira infrenta ne’e primeiru estrada, saúde, liu-liu ha’u nia suku ne’e, tanba iha ne’eba postu saúde iha, maibé dala barak komunidade sira ba konsulta ne’e aimoruk falta,” informa Xefe Suku Labarai, Paulo de Sena ba jornalista sira iha resintu Palásiu Prezidensiál Bairu-Pite, Dili, Segunda 07/04.
Nia dehan, bee moos, bele hatete 80% komunidade sira asesu hotu, soké iha aldeia Roce eskola iha eskola balun asesu estrada di’ak, maibé fallansu mak bee iha eskola laiha.
Nia esplika, atu responde ba komunidade nia preokupasaun, hanesan lideransa tenke halo proposta, hatama ba instuituisaun relevante, nune’e haree mós komunidade sira nia nesésidade ne’ebé presiza.
Nune’e mós saúde, dala barak mós autoridade lokál sira enkontru iha Munisípiu Kovalima kona-ba aimoruk, kuaze iha Timor laran tomak ne’e barak mak halerik aimoruk ne’e falta ka menus.
Tanba ne’e, dala ruma komunidade sira ba konsulta inan isin rua ho bebe sira ba konsulta mós dala ruma aimoruk laiha, sira hatudu de’it mak klínika ida ne’e mak sai preokupasaun ba komunidade.
Nia explika liu tan, postu saúde agora sira responde tiha ona, doutor, parteira sira asesu hela bee moos. Nune’e postu saúde ne’e rekursu umanu sufisiente, tanba na’in neen, doutor na’in tolu, no parteira na’in tolu sufisiente, soké fallansu mak aimoruk.
Tanba ne’e husu ba parte relevante sira atu tau atensaun masimu ba problema sira ne’ebe maka komunidade sira hasoru, liu-liu komunidade sira iha Suku Labarai.
Suku Labarai, Postu Administrativu Suai Villa, Munisípiu Covalima, Iha aldeia lima hanesan, Meop, Holba, Maubelis, Bonuc, Roce, uma kain hamutuk iha 643, totál populasaun iha 3.455.