Reportajen Silvino Freitas
Polisia Nasional Timor-Leste (PNTL) avalia servisu semetral nian hodi fo orientasaun ba membru sira nunee haforsa nafatin servisu polisiamentu komunitaria nian no orienta mos servisu polisia nian iha fronteira atu servisu hamutuk ho komunidade sira iha area suai, bobonaro no oekusi atu kontrola movimentu illegal neebe kontinua ultrapasa fronteira illegal, enkuantu PNTL ba dadaun nee membru la sufisiente atu hala’o servisu ho di’ak iha terenu.
Tuir Komisariu PNTL Henrique da Costa dehan, avaliasaun servisu polisia nian hahu komadante munisipiu unidade no diresaun sira hotu durante fulan 6 nian hahu husi janeiru too junu nian nomos fo orientasaun ba komadante sira atu bele halao servisu iha terenu ho diak liu tan liuliu servisu investigasaun nian tanba dadaun nee numeiru krime neebe rejista ba fulan 6 tinan ida neebe barak liu mak ofensaba integridade fizika nomos violensia domestika neebe domina nafatin.
“konaba atividade polisiamentu komunitaria nian ita haree sira nia atividade vizita ba eskola ho komunidade halo enkontru ho komunidade sira joven sira atividade desportu nian social no kultura sira nian, sira halao no asegura ita husu para sira hasae atividade sira hanesan nee” dehan Komisariu Henrique ba jornalista sira iha academia polisia Komoro, (10/07).
Nia dehan tan, orienta mos polisiamentu komunitaria atu servisu hamutuk ho parseiru sira iha munisipiu sira atu kria nafatin ativiade desportu sira atu envolve joven sira atu bele prevene krime sira no joven sira mos bele hatene servisu polisia inklui mos hasae joven sira nia skill iha area desportu nian, orientasaun mos ba komadante unidade especial polisia nian atu halo servisu koordenasaun ho komandu iha fronteira nian maka suai bobonaro oekussi servisu mos ho UPM servisu sekreta polisia nian SNI nomos ita nia komunidade sira tenke servisu hamutuk hodi nunee prevene movimentu illegal iha fronteira nian.
“ita hatene katak ho numeiru neebe iha nee difisil maibe kuandu ita servisu diak ho parseiru sira seluk ita bele prevene no asegura fronteira ho diak liu tan” nia dehan.
Komisariu Henrique salienta tan, polisia identifika katak iha joven balun neebe hakat liu fronteira hodi ba sae sabuk iha Indonesia neebe balun utilize dokumentu legal hanesan pasaporte no balun liu husi dalan illegal, nunee balun neebe konsege kaer hodi aprezenta ba ministeriu publiku hodi halo investigasaun nunee mos pesoal seguransa sira neebe destaka iha postu fronteira difikulta tebes atu halo kontrolu tanba distansia postu neebe dook malu bele kria tan postu maibe susar atu koloka ema.
“komadante sira mos kestiona iha munisipiu rasik mos membru la too iha unidade mos membru la too departamentu nee kria mos ema nain 1 ka 2 deit ida nee impaktu ba servisu operasional nian” nia konklui.