Reportajen Umbelina dos reis
Ema deskonesidu kontinua nauk Ai-kameli hun boot rua iha Aldeia Dara-oma, Suku Laisorulai de Baixo, Postu Administrativu Matebian, Munísipiu Baucau, Tanba ne’e husu ba Ministru relevante sira tenki proteje ai-kameli tanba ai-kameli ne’e rikeza Timor-Leste nian.
Liuhusi via telephone, Xefe aldeia Dara-oma, suku Laisorulai de baixo, postu administrativu Matebian, Munisipiu Baucau, Candido Jeronimo informa, ema deskonesidu tesi ai-kameli hun rua iha komunidade aldeia Dara-oma nia tos laran kuaze loron haat ona. Ai-kameli la’os primeira vez estraga lakon iha postu Matebian, maibé tinan 2023 mos lakon iha suku Laisorulai de Baixo. Se ai-kameli sira ne’e hanesan rikeza ba nasaun nian karik, agora ba oin tenki konserva no hetan protejidu másimu hosi estadu, se lae ema deskonesidu kontinua estraga.
“Iha loron 21 fulan jullu komunidade aldeia Dara-oma informa ba autoridade aldeia katak nia ai-kameli hun rua lakon iha sira nia tos laran, se mak kado sira la haree rasik ho matan, Maibe ami informa ona ba eskuadra Postu Matebian hodi mai deskobre ona fatin no ai-kameli refere ami kado lori hotu ona ba munisípiu Baucau.” Dehan xefe aldeia Dara-oma, Candida Jeronimo, ba Neon Mentin, liuhosi via telephone, kuarta 23/04.
Tanba iha postu administrativu Matebian seidauk iha seguransa ba guarda foresta nian, tanba ne’e mak dalaruma ema deskonesidu aproveita hodi nauk ai-kameli sira ne’e, la’os foin akontese primeira vez iha ne’e maibé tinan 2023 akontese uluk iha suku Laisorulai de Baixo ema deskonesidu tesi bei-beik ai-kameli iha komunidade sira nian toos laran.
“Ha’u nia rekomendasaun ba parte ministériu relevante sira karik bele rekruta seguransa guarda floresta nian mai destaka iha area rural hanesan fatin sira ne’ebé ai-kameli moris ba, tanba rikeza ai-kameli ne’e laos ema individu nian de’it, maibé rikusoin Timor-Leste nian nune’e governu presiza tau atensaun másimu ba ai-horis sira ne’ebé iha benifisiu ba nasaun nian, nune’e ita presiza foti solusaun hodi proteje.” nia husu.