Reportajen Silvino Freitas
Deputadu bankada Partido Libertasaun Popular (PLP) preokupa ho dezisaun deputadu bankada governu CNRT ho PD inklui bankada KHUNTO neebe desidi emediatamente kansela sosa karreta prado unidade 65 ba deputadu sesta lejislatura neebe orsamentu aprova tiha ona ho montante $4,225 miloens no prosesu akizisaun lao tiha ona, no sira desidi atu sosa karreta iha nasaun Singapura no Malaysia, nunee PLP husu estudante no kamada social atu akompana nafatin ba prosesu alterasaun proposta sosa karreta no realokasaun orsamentu refere.
Xefe bankada PLP Angelina Sarmento dehan, iha debate OJE tinan 2025 neebe realiza iha fin fulan novenmbru nian sira hatoo ona proposta 6 neebe sira husu atu pondera disizaun neebe foti ona iha konsellu administrasaun hodi sosa karreta 65 unidade ba deputadu 65 iha sesta lejislatura nian, nunee sira nia proposta nee hatoo iha alterasaun hamutuk iha $4,225 miloens neebe destina atu sosa 65 veikulu ba deputadu sira sira iha proposta 4 neebe sira husu atu hasai ka koa tiha osan ba sosa karreta nian no iha proposta rua seluk maka sira husu atu hasai osan viajen estranjeiru hamutuk $500,000 no $715,000 viajen estranjeiru ba parlamentu nasional.
“infelizmente ami nia proposta hamutuk 7 nee la hetan fatin ba diskusaun, nunee automatikamente proposta nee aprovadu ho proposta original neebe parlamentu nasional submete ba governu hodi lori hikas mai, nunee altura nee diskusaun ba OJE 2025 nian orsamentu nee aprovadu ona” dehan Xefe bankada PLP Angelina Sarmento liuhusi komunikadu imprensa, iha sala bankada PLP, (15/09).
Nia dehan tan, 2025 tama iha fulan junu parlamentu-nasional deklara ona ba publiku liuhusi sekretariu jeral sira ezekuta ona iha tinan 2025 liuhusi loke tenderizasaun ba publiku atu aplika, tuir informasaun neebe sira asesu katak projetu ba akizisaun prosesu lao ona, nasaun rua maka parlamentu nasional hili atu sai fatin neebe atu sosa karreta maka Singapura no Malaysia, maibe ohin bankada 3 neebe durante nee afavour ba sosa karreta teki teki desidi kansela sosa karreta prado.
“triste tebes mai ami katak bainhira estudante sira halo ona asaun iha ona vitima ba danus fiziku maka bankada 3 nee foin hakfodak hodi kansela sosa karreta” dehan xefe bankada PLP.
Angelina Sarmento esplika tan, deklarasaun husi bankada 3 desidi hapara sosa karreta maibe osan provadu tiha ona no osan sira nee atu realoka ba neebe, nunee proposta neebe antes nee sira fo maka atu osan sosa karreta nee aloka ba seitor saude neebe situasaun kritiku tebes, seitor saude, seitor agrikultura hortikultura no kafe tanba seitor sira nee mak lori ita atu hamenus depedensia ba fundu petrolifero, nunee estudante sira tenke haree mos kona ba $4,225 miloens neebe liuhusi bankada governu desidi kansela ona osan nee atu realoka ba neebe tanba presiza halo alterasaun no karik la uza tenke fila ba kofre estadu, nunee deputadu sira tenke hatene osan $4,225 miloesn nee realoka ba neebe presiza loke diskusaun iha parlamentu.
Hafoin estudante universitariu sira halo asaun pasifika iha parlamentu nasional oin parlamentu nasional liuhusi bankada parlamentar 3 maka CNRT, PD ho KHUNTO desidi kansela ona sosa karreta prado unidade 65 ba deputadu sesta lejislatura.