Reportajen Silvino Freitas
Relasiona ho ejijensia Estudante Universitariu Timor-Leste (EUTL) nian neebe ejiji pontus sira maka kansela no hapara kultura sosa karreta ba deputadu sira, alterasaun lei liberdade reuniaun no manifestasaun nian, alterasaun lei pensaun mensal vitalisia, nunee EUTL reprezenta husi portavoz nain 5 halo ona dialogu ho Parlamentu Nasional (PN) inklui deputadu husi bankada CNRT, PD ho KHUNTO.
Porta-voz EUTL Natalicio Nunes dehan, tuir sira nia ejizensia neebe halo ona dialogu ho parlamentu nasional nunee desizaun neebe parlamentu nasional liuhusi bankada 3 maka CNRT, PD no KHUNTO desidi ona hodi hapara emediatamente politika sosa kareta foun prado, sira nia ejijensia mos atu halo alterasaun ba lei liberdade manifestasaun neebe sei iha hela prosesu no sei desidi liuhusi rezolusaun iha parlamentu nasional, maibe karik ejijensia sira nee mak laiha desizaun sira sei kontinua kontra.
“konaba alterasaun lei pensaun mensal vitalisia iha dialogu ida nee prezidente parlamentu nasional inklui bankada PD, KHUNTO no CNRT maibe bankada PLP ho FRETILIN aujensia husi enkontru ida nee, tanba nee sira deklara sira kansela sosa kareta foun iha mandatu ida nee no deklara hapara kultura sosa karreta foun, maibe husi bankada 3 deit CNRT, PD ho KHUNTO no PLP ho FRETILIN la marka prezensa iha dialogu ida nee” dehan porta-voz EUTL Natalicio Nunes hafoin halo dilogu ho parlamentu-nasional, (15/09).
Nia dehan tan, ejijensia neebe EUTL ejiji maka kansela sosa karreta foun ba deputadu sira aliende nee mos sira ejiji atu hapara ona sosa karreta foun ba deputadu sria iha kada mandatu lejislatura, nunee mos sira ejiji atu halakon lei penasun mensal vitalisia neebe fo bokur ba deputadu sira ho sira nia jerasaun sira sira mos ejiji ba parlamentu-nasional atu define didiak lei ba liberdade reuniaun no manifestasaun nian neebe haktuir iha lei numeiru 1/2006 neebe limita direitu liberdade sidadaun nian atu bele espresa no asaun hasoru governu inklui parlamentu-nasional.
“ami mos husu ba sira atu alokasaun orsamentu jeral estadu ba seitor produtivu iha baze antes nee ita hatene alokasaun ho pursentu menus husi 10% tanba nee maka ami husu atu aloka persentajen boot ba seitor produtivu sira hodi hadia povu nia moris” dehan Porta-voz EUTL Natalicio.
Nia dehan tan, husi dialogu nee sira parlamentu nasional desidi ona katak iha semana ida nee nia laran sei iha konsensu ida ho rezolusaun neebe aprezenta ba plenaria hodi publiku bele rona sira nia deklarasaun, enkuantu EUTL nafatin ho pozisaun ida katak sira nafatin resisti hodi hein rejolusaun ikus ba sira nia ejijensia neebe sira hatoo no halo ona dialogu ho prezidente parlamentu nasional hamutuk ho deputadu husi bankada CNRT, PD ho KHUNTO.
Nunee, tuir observasaun jornalista Neon-Metin nian katak EUTL neebe kompostu husi estudante husi UNITAL, UNTL, UNDIL, UNPAZ no seluk tan hamutuk ho kamada social sira halo manifestasaun iha parlamnetu-nasional oin hahu husi dadesaan tuku 8:00 too 12:00 meiudia hafoin husi parlamentu nasional husi halo dialogu ho EUTL, maibe iha manifestasaun nee hamosu mos konfrontu kiik entre estudante sira tanba tuda masa mamuk ba resintu parlamentu nian nunee polisia hapara manifestante ho gas-lakrimuzeniu halo estudante balun kanek inklui jornalista neebe halo kobetura iha asaun refere, maibe EUTL kontinua too 12:00 meudia bele hetan solusaun temporariu liuhusi dialogu entre EUTL ho parlamentu-nasional.
