Reportajen Cresência no Zemila
Iha ambitu seremonia insar bandeira ne’ebe hala’o iha palacio prezidensiál, Elias da Costa ne’ebe partisipa mos iha seremonia ne’e, ba Neon Metin nia hato’o nia preokupasaun konaba situasaun ne’ebe povu sei hasoru, liu-liu sistema saude ne’ebe sei aat, no falta sasan sira hodi apoiu setor saude.
Elias hateten presija hadia sistema, no lori paz ba joven sira.
“Hau nia esperansa ba oin, bele iha sistema saude ne’ebe diak ,no dook husi konflitu nia laran, katak dame ba povu Timor-Leste” dehan nia
Hanoin hanesan mos husi Angelina Amaral, hateten Independénsia ba -23 hanoin tempu la barak, maibé tempu mós naton ona atu kontinua dezenvolve rai ne’e ba interrese povu ida-ne’e nian, ho nune’e, apela ba hotu-hotu nia kontribuisaun no apoiu, atu dezenvolvimentu la’o nafatin ba oin.
“Atu hadia rai doben ida ne’e iha parte tolu mak ita presija tau intrese mak kapitál sosiál, dezenvolvimentu infraestrutura no dezenvolvimentu ekonómiku, ikus liu hametin Paz”, dehan nia
Iha diskursu Prezidente Republika, Dr. Jose Ramos Horta hateten, espera iha tinan 5 to’o 10 oin mak, governu sei halo progresu liutan ihakriasaun empregu ba foin-sa’e sira, hadi’a edukasaun no saúde, habelar investimentu iha agrikultura, seguransa ai-han no halakon stunting, malnutrisaun infantil no mortalidade infantil no inan.
