Reportazen Zevonia Vieira
Ministeriu Saude (MS) deteta tan kazu konfirmadu COVID-19 hamutuk 98 hosi loron 7-8 Abril nian. Liu hosi komunikadu imprensa ne’ebe Neon Metin asesu, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr.Dr Rui Maria de Araújo relata katak evolusaun surtu COVID-19 municipio Dili iha loron 7 – 8 Abril deteta kazu foun 67, nune’e kazu detetadu ka pozitivu iha Munisipiu Dili husi loron 7 Marsu – 8 Abril 2021, hamutuk 689.
Iha municipio Baucau iha loron 7-8 Abril deteta kazu foun 5, Kazu pozitivu hirak ne’e ba husi Dili. Hamutuk iha Baucau iha 34 Kazus detetadus, iha cluster 11.
Iha Ermera iha loron 7-8 Abril deteta kazu foun 20, kazu pozitivu hirak ne’e ba husi Dili no lori fila mai izolamentu iha Dili. Ekipa konjunta saúde buka-tuir ona kontaktu-besik sira hotu.
Iha Covalima iha loron 7 Abril deteta kazu pozitivu nain 1, kazu pozitivu ida ne’e halo viajen husi Dili iha loron 2 Abril 2021.
Iha Ainaro deteta kazu foun hamutuk 5 iha loron 7 Abril 2021, kazu pozitivu hirak ne’e ba husi Dili no lori mai izolamentu iha Dili, ekipa konjunta saúde buka-tuir ona kontaktu-besik sira hotu.
Nune’e dadus jeral ba loron 7-8 Abril total 98, iha Dili nain 67, no 31 iha municipio seluk. Kazu rekuperadu iha loron 7 no 8 Abril 2021 iha nain 90. Total kazu ativu ohin loron 8 Abril hamutuk 493.
Husi total kazu foun ohin mane 57, feto 41, sira hotu asintomátiku. Husi loron 7-8 Abril ne’ebe halo teste PCR hamutuk 1125, inklui 530 testes ba ema ne’ebé halo pedidu, atu hetan autorizasaun esepsionál hodi sai husi serka sanitária iha Munisipiu Dili.
