Reportajen Joanina Casemiro
Joven sira husu Prezidente Repúblika foun Iha Períodu 2022-2027, hodi hametin relasaun bilateral no multilaterál, hodi dijitaliza iha área komunikasaun, no atu hare ba Lei pensaun vitalisia ne’ebe la fo benefísiu ba povu no nasaun, atu haforsa kombate makaas korrupsaun iha Timor-Leste.
Ba Neon Metin Pedro Ximenes (34), Munisipiu Baucau hateten presiza kria sistema votasaun online, tanba ohin loron iha nasaun barak halo votasaun, la presiza ba Munisípiu, bele halo votasaun iha kualker momentu no oras liu husi online, ema hotu akompaña iha eleisaun Segunda volta taxa partisipasaun votante menus, tanba ema laiha osan atu selu transporte ba tuir votasaun iha munisípiu.
Nia dehan pesoalmente nu’udar Juventude sempre tau esperansa boot ba Xefe Estadu, hodi hamosu unidade nasionál, hare ba futuru, 100% Timor-Leste tenke moris goza independénsia
Pedro mos dehan Prezidente foun tenke fo hanoin ba governu, atu investe makaas iha rekursu umanu, liu-liu joven sira hodi nune sira prepara rekursu atu kompete iha kampu serbisu iha rai laran no liur, hodi bele hasae kreximet ekonomia no dezenvolvimentu nasaun, nune para ona hodi hatún malu ka odio malu
“Ha’u husu ba Prezidente foun tenke serbisu hamutuk ho orgaun Estadu ne’ebe nu’udar ai-rin Nasaun nian, hodi bele diskute problema juventude nian, ne’ebe mak hanesan problema dezempregu no mos atu hare fila fali Lei pensaun vitalisia ne’ebe la fo benifisiu ba povu no nasaun, atu haforsa kombate makaas korrupsaun iha Timor Leste”, Dehan Pedro Ximenes ba Neon Metin iha 19/04.
Neon-Metin halo entrevista ho Virginia Ximenes De Deus Idade ( 25) Munisipiu Ermera hateten Prezidente foun tenke lori dezenvolvimentu ne’ebe inkluzivu, tau matan ba ema kbiit laek sira, sai aman edukadór ba povu.
“Hanesa foinsa’e Prezidente ida ne’ebe mak povu fo fiar tenke lori povu ba moris di’ak, espera nafatin hala’o servisu ho diak tau matan mai ami nia preokupasaun sira área rurais Tenke had’ia estrada, tanba to’o ohin loron komunidade barak mak seidauk asesu eletrisidade nune’e povu bele sente saida mak ukun-an,” Dehan Virgina.
Nazario Varela Idade (25) Munisipiu Likisa dehan nu’udar foinsa’e nia esperansa ba Prezidente foun tenke kumpre promesas sira ne’ebe hato’o iha kampaña, no labele sai kurtina hodi taka interese grupu nian
“Imi nia promesa mak povu nia esperansa, povu hein promesa hirak ne’ebe iha kampaña katak sei lori moris di’ak ba sira iha futuru, tenke kumpre bainhira eleitu nu’udar Prezidente Repúblika la’os promesa hirak ne’e sai fali retórika,” nia dehan.
Nia rekomenda ba Prezidente foun atu tau importánsia ba foinsa’e sira iha area edukasaun no agrikultura
Felismina Mesquita (32) hanesan joven nia esperansa ba Prezidente foun mak tenke haburas demokrasia hodi lori Timor ba mundu, hametin relasaun bilateral no multilateral, no dijitaliza area komunikasaun, hametin unidade no fraternidade.
