Reportajen Filomena Da Concenção
Organizasaun Nasoins Unidas (ONU) liu hosi programa Scaling Up Nutrition (SUN) fó valór ba Prezidente da Republika, Dr.José Ramos Horta tanba nia kontribuisaun, hodi kombate no hadia mal nutrisaun iha Timor-Leste ne’e bo’ot tebes.
Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU), Gerda Verburg hateten, Timor-Leste sai ona membru Scaling up nutrition ba tinan rua ona, nune’e mòs Timor-Leste sai ona parte ida husi 65 ne’ebè iha SUN, tanba ne’e governu Timor-Leste tenke halo servisu barak atu hadia no prevene mal nutrisaun iha Timor-Leste no investe barak liu tan iha seguransa ai-han no nutrisaun.
Tanba investimentu ida ne’e hala’o servisu hamutuk kolaborasaun di’ak entre Ministériu balun ne’ebé ligasaun ba nutrisaun no seguransa ai-han nune’e mós kolabora di’ak ho ONU parseiru dezenvolvimentu sira hanesan doadores, setór privadu no sosiedade sivíl no haree Timor-Leste mós akademik no juventude sira ativu liu.
Scaling Up Nutrition (SUN) mós fo valor ba Josè Ramos Horta nia lideransa, tanba guia nasaun Timor-Leste hodi investe barak liu tan ema, liuliu iha mal nutrisaun nian, tanba nutrisaun hanesan meiu ida atu dezenvolve fiziku no kakutak nune’e mòs , nutrisaun hanesan pontu importante iha ema nia vida lor-loron.
“Ha’u so mai fo valór tan de’it ba ninia lideransa hodi guia nasaun ida ne’e, investe barak liu tan ema liuliu iha mal nutrisaun, tanba nutrisaun mak meiu ida atu dezenvolve ita nia dezenvolvimentu fizíku no kakutak tanba ida ne’e importante ba dezenvolvimentu Nasaun ne’e ba oin,” Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU), Gerda Verburg dehan, hafoin hasoru-malu ho Ramos-Horta iha Palásiu Prezidensiál Nicolau Lobato Bairo-Pité, Tersa 29/11.
Nia haktuir, depois de harii demokrásia, liberdade, páz iha tinan 20 nia laran, tempu ona Timor-Leste iha ema atu nune’e ema bele sai hanesan, parte ida atu lori dezenvolvimentu sosiál no ekonómia Timor-Leste nian ba oin tan.
Koordenadór Globál Movimentu Hadi’a Nutrisaun no Sekretáriu Adjuntu Organizasaun Nasoins Unidas (ONU) hatutan, objetivu ohin hasoru malu ho PR ne’e koalia konaba pontu tolu mak hanesan susuben inan, ai-han seguru, no fo valòr ba ema sira ne’ebè halo pratika diak liu tan iha area nutrisaun no seguransa ai-han nian
“Ami ko’alia prioridade sira hanesan prímeiru, oinsá fokus liu tan ba fó susu -been inan ninian, segundu mak kona-ba ai-han ne’ebé mak seguru, terseiru mak ko’alia kona-ba oinsá fó valór bá ema sira ne’ebé halo prátika di’ak liu tan iha área nutrisaun no seguransa ai-han nian,”Nia esplika.
Nune’e mós koalia konaba Pré-eskolar nomós merenda eskolar no fokus ba primeiru mill dias, atu nune’e bele prepara di’ak labarik no dezenvolve sira nia kakutak.
“Ha’u hanesan konvensidu tebe-tebes ho PR ninia lideransa atu nune’e bele lidera dezenvolvimentu ida ne’e investe di’ak liu tan nia povu no atu lori povu ne’e ba páz no prospriedade,” hakotu nia.
