Home Notisia Media RENETIL Neon Metin Manan Premiu Jurnalismu ba Paz Maria Gorete Hosi...

Media RENETIL Neon Metin Manan Premiu Jurnalismu ba Paz Maria Gorete Hosi CNC

422
0
foto liman los Diretor Ezekutivu CNC entrega premiu ba Francisco, foto liman karuk familia saudoza Maria Gorete mana Bety koalia virtual ho ekipa iha Balibo. [Foto: Neon Metin | 19.10.2020]

Reportazen Marcio Pinto Morato

“Sira bele koloniza hau nia isin, maibe sei la koloniza hau nia espiritu no hau nia fuan”. Saudoza Maria Gorete

Media no Jornalista Neon Metin manan media award katergoria Jurnalismu ba Paz Maria Gorete.

Liu hosi loron Balibo Five badala 45 ne’ebe komemora iha Balibo, jornalista Neon Metin Francisco Jose de Almeida, Adroaldo, Adalgisa Pereira no David da Costa Gusmao sai manan nain ba kategoria Jurnalismu ba Paz Maria Gorete ne’ebe

Kategoria Maria Gorete nudar award badahuluk nian, ne’ebe lansa hosi Centro Nasional Chega! (CNC) hodi fo ba media no jornalista sira ne’ebe hakerek istoria konaba jurnalismu ba paz no direitus umanus nian.

Liu hosi kalan atribui media award ba manan nain sira, jornalista Neon Metin, Francisco Jose Almeida reprezenta Neon Metin hodi agradesementu ba CNC no familia Maria Gorete ne’ebe mak fo fiar ona ba Neon Metin, hodi hetan premiu Maria Gorete.

“Reprezenta ekipa Neon Metin, hau hakarak hato’o hau nia sentimentu orgulho hodi hamrik iha oin ho hau nia kolega simu Premiu ida ne’e, Premiu Jornalizmu ba Paz Maria Gorete”, hateten Francisco, 19/20.

 Nia dehan  saudoza Maria Gorete nia luta nudar feto, husik hela memoria todan ba ita nia sosiedade, liliu mai ami nia jerasaun. Istoria pedasuk ida mak hau hetan kona ba saudoza Maria Gorete, hau aprende katak saudoza ne’e feto luta nain duni. Nia nega nia an hanesan ema no hanesan feto, hodi fo an tomak ba luta, to’o nia mate ka lakon, to’o agora seidauk hatene loloos.

“Bainhira lee istoria Saudoza Maria Gorete nian, hau mos triste. Hau triste tanba saida mak Saudoza hasoru iha tempu luta ba ukun rasik an, akontese fali iha tempu ukun an nian. Uluk militar Indonesia mak halo, agora ita ho ita mak halo ba malu. Anoi, istoria violasaun sexual ne’ebe Neon Metin foti akontese iha familia uma laran. Saudoza Maria Gorete hetan violasaun sexual hosi Militar Indonesia. Anoi moris iha kondisaun kiak nia laran, Saudoza moris iha situasaun la seguru nia laran. Situasaun rua ne’e hotu la favorese ba feto no ba familia hotu-hotu”, tenik Francisco  

Nia hatutan Saudoza Maria Gorete fo nia an tomak atu nia maluk feto sira loron ida, iha Timor-Leste ukun rasik an nia laran, la terus tan, la hetan tan violasaun sexual no la moris kiak tan. Loloos ne’e saida mak akontese ona ba Saudoza Maria Gorete to’o ona, Chega!, ho Maria Gorete deit, la presija akontese tan ba Anoi.

Francisci dehan nudar Media Advokasia RENETIL nian, Neon Metin komprometidu atu kontinua luta ba hapara violasaun sexual hasoru feto. Saudoza Maria Gorete foti informasaun militar Indonesia nian hodi fo ba FALINTIL sira hodi kontinua reziste. Neon Metin hakarak kontinua foti informasaun faktual sira kona ba ema vulneravel sira, feto, labarik no ema ho defisiensia, hakerek no fahe tutan informasaun hodi hetan atensaun politik publik nian.    

“Ami husu obrigado ba Familia Saudoza Maria Gorete tanba Saudoza inspira ona ami. Premio ida ne’e sei fo motivasaun boot ami nia servisu hodi hatutan no kontinua defende direitu feto nian. Husu obrigado ba RENETIL ne’ebe fo ona espasu baa mi atu aprende no kontinua halo rezistensia hasoru hahalok aat sira mak kontra liberdade expresaun no liberdade imprensa”, hateten Francisco

Iha tempu hanesan Mana Bety familia hosi Maria Gorete ne’ebe oras ne’e dadauk hela iha Australia, hatoo agradesementu ba CNC ho Konsellu Imprensa ne’ebe hili ona Maria Gorete nudar premiu id aba jornalista sira ne’ebe mak hakerek konaba direitus umanus.

“Agradese tebes tanba hili ona naran Maria Gorete hodi sai premiu importante ba jornalista sira ne’ebe mak hakerek konaba direitus umanus. Maria Gorete hatudu ona nia luta ba ukun rasika-an, to’o nia sakrifika nia an, hodi hetan violasaun sexual hosi tropas Indonesia. Nia halo tanba nia hadomi nia rai no lakohi rai ne’e sai atan ba ukun kolonialismu”, Tenik Bety liu hosi zoom iha loron Balibo Five.

Maria Gorete nia lia fuan forte mak nia hateten, “sira bele koloniza hau nia isin, maibe sei la koloniza hau nia espiritu no hau nia fuan”.

Nia iha esperansa boot ba jornalista sira ohin loron, atu kontinua brani hakerek no fo sai lia los, liu-liu hakerek konaba direitus umanus. Espera Maria Gorete sai inspirador ba jornalista tomak atu kontinua brani hodi hakerek lia los.

Alende Neon Metin ne’ebe sai manan nain ba kategoria Jurnalismu ba Paz Maria Gorete, premiu Konsellu Imprensa kategoria Media Diak Liu Tinan 2020 monu ba Jornal Independente no Premiu Adelino Gomes Jornalista Ne’ebe Hakerek Portugues Diak liu monu ba Isaura hosi Timor Post.

Print Friendly, PDF & Email

LEAVE A REPLY

Please enter your comment!
Please enter your name here