Reportajen Santina Lucia da Costa
Prezidente Repúblika, Dr. Francisco Guterres Lu Olo, simu karta Kredénsial husi Embaixadór Repúblika Indonesia foun mai Timor-Leste, Okto Dorinus Manik, ne’ebe iha komitmentu hodi hametin liután kooperasaun bilateral iha area komérsiu
Ministra Negósiu Estranjeiru no Kooperasaun (MNEK), Adaljiza Magno ne’ebé akompaña Xefe Estadu simu karta kredénsial husi Embaixadór Indonézia foun mai Timor-Leste, hato’o mensajen husi Prezidente Repúblika Indonesia Joko Widodo katak, kometimentu Indonesia nian hodi hametin liutan kooperasaun bilateral, entre Indonesia ho Timor-Leste liuliu area komérsiu.
“Ohin ha’u akompaña Prezidente Repúblika simu karta kredensiál hosi Embaixadór foun mai Timor-Leste, Okto Dorinus Manik, nia mai aprezenta karta kredensiál ba Prezidente Repúblika Francisco Guterres Lu Olo no embaixadór foun ne’e iha kometimentu hodi hametin liu tan kooperasaun bilaterál Repúblika Indonézia no Timor-Leste iha área komérsiu nian.” Hateten, Ministra Negósiu Estranjeiru no Kooperasaun (MNEK), Adaljiza Magno, ba jornalista iha Palasiu Prezidensial Nicolau Lobato, Bairu-Pite, 13/12.
Adaljiza dehan Timor ninia relasaun ekonómiku maka’as liu ne’e ho Indonesia, sasán parte barak liu importasaun Timor nian mós barak liu mai husi Indonesia.
Entretantu iha ámbitu Aprezenta Karta Kredensiál ne’e, Embaixadór foun Indonesia mai Timor-Leste, kontenti ho situasaun covid-19 ne’ebe Timor-Leste kontrola di’ak, Timor laiha problema, no Indonesia mós kontrola di’ak, espera katak ba oin bele serbisu hamutuk hodi rezolve sasan sira ne’e hamutuk.
Adaljiza Magno Konklui, Prezidente Republika Francisco Guterres Lu Olo kontenti relasaun bilateral Timor-Leste ho Republika Indonesia, nia hato’o komprimentus ba nia omólogu Prezidente Indonesia Joko Widodo, nia kontente tebes relasaun ho Timor ne’ebé agora iha, para kontinua nafatin relasaun ne’ebé iha.
