Reportajen David da Costa Gusmao
Prezidente Komité 12 Novembru, Gregório Saldanha ‘Mouris’ apela ba povu Timor-Leste tomak iha momentu ne’ebé atu tranzlada Max Stahl ninia sinzas ba haloot iha Santa Cruz, hotu-hotu tenke prezensa hodi fó apoiu no onra ba saudozu Max Stahl.
“Max Stahl hatudu nia kontribuisaun boot tebes ba ita nia rain, no ba ita nia povu ida ne’e. Portantu hakarak apela ba povu Timor-Leste tomak, atu ita hotu momentu ne’ebé ita atu tranzlada ninia sinzas ba haloot nia sinzas iha Santa Cruz, ita hotu tenke fó apoiu no onra ho ita nia prezensa,” Dehan Mouris, iha Centru Audio Vizual Max Stahl (CAMSTL), Segunda 13/12.
Nia haktuir alende ne’e mós bainhira tranzlada Max Stahl nia Sinzas husi aero portu Internasinál Nicolao Labato Comoro Dili, tuir rute ne’ebe mak komisaun prepara ona, “Ita tenke marka ita nia prezensa no hamrik iha dalan ou lao tuir no inportante ita fó ita nia onra, ita respeitu no mós ita nia agrdesememtu ba malae mutin ne’ebé sai hanesan Timor, maske nia ema raiseluk maibe mai halot fali iha Timor”.
Nia dehan Max Stahl ema hotu hatene, nia ema malae mutin ida, depois nia sai ema Timor. Tanba nia hakarak luta, nia brani no nia ema matenek, laos 12 Novembru de’it. Maibe depois akontese 12 Novembru, nia fó kontribuisaun nafatin no nia luta nafatin, hodi apoiu ba Timor nia luta to’o hetan libertasaun. Depois to’o 20 anos nia hela iha Timor, nia uma mak ne’e, agora sai fatin Audio Vizuál Max Stahl, nia serbisu nafatin maski nia moras, maibe nia la preokupa nia moras to’o mate.
Nune’e mós Hakarak hato’o mensajen espesiál ba ema 12 Novembru sira, momentu hahú lori ona Max Stahl nia sinzas mai ona no atu simu, mate restu 12 Novembru tenke hatais hotu kamizola 12 Novembru no tara hotu medalla ne’ebé mak simu ona.
“Hau hakarak hato’o hau nia mensajen ba mate restu 12 Novembru bainhira ita simu ita nia matebian max Stahl nia Sinzas ne’e, mate restu 12 Novembru sira nia tenke mai ho nia identidade rasik ho sira nia kamizola 12 Novembru nian no sira nia atributu sira kondekorasaun medaila sira ne’ebé simu ona no bele tara hotu, ida ne’e mak rezultadu husi luta sira nian hamutuk ho Max Stahl no povu Timor-Leste,” nia konklui
Christopher Winner, koñesidu liu ho naran Max Stahl, moris iha Reinu Unidu iha loron 06 dezembru 1954, hanesan responsável ba filmajen no imajen Masakre Santa Cruz, ne’ebé akontese iha loron 12 Novembru 1991. Max Stahl, hakotu iis iha loron 28 outubru, iha Brisbane, tanba moras ne’ebé nia sofre kleur ona.
