Reportajen David da Costa Gusmao
Relasiona ho Sinzas Max Stahl nian ne’ebé mak sei to’o Timor iha loron 15 Dezembru, sei simu direita husi lider nasionál Xanana Gusmao no Dr. Jose Ramos Horta
Liuhusi konferénsia imprensa, Prezidente Komisaun Organizadora, Silvério Pinto dehan husi Komité Ezekutivu ho Komité 12 Novembru ne’ebe hola parte iha komisaun organizadora, husu ba lider nasionál na’in rua atu simu sinzas Max Stahl nian
“Depois ami enkontru reprezentante husi organizasaun rua husi Komité Ezekutivu ho Komite 12 Novembru, ne’ebe mak hola parte iha komisaun organizadora husu lider nasionál na’in rua hanesan lider Xanana Gusmão ho Jose Ramos Horta mak atu simu ita nia saudozu Max Stahl nia sinzas ne’ebé mak sei to’o mai,” Nia dehan, iha Centru audio vizual Max Stahl (CAMSTL), Segunda 13/12.
Nia haktuir razaun sira husu maun boot na’in rua ne’e tanba liga ho saudozu Max Stahl nia serbisu iha momentu 12 Novembru 1991, Kuandu liga ho maun Xanana, tuir Komite Ezekutivu nia hatene no organiza asaun 12 Novembru katak, bainhira saudozu Max Stahl, iha tempu ne’ebá nia iha hela Baucau hamutuk hela ho komadante David Alez “Daitula” sira.
“Max Stahl simu orden husi Komandu da Luta, ita nia maun boot Xanana, nia simu orientasaun mai halo kobertura asaun 12 Novembru 1991 nian, entaun informasaun ne’e tranzmite husi Komite Ezekutivu iha tempu ne’ebá, entaun iha Dia 11 kalan Saudozu Max Stahl husi Baucau mai Dili depois iha loron 12 nia halao nia kna’ar hanesan jornalitas hodi halo kobertura ba akontesementu ne’e,” nia esplika.
Nia hatutan tan konaba maun boot Jose Ramos Horta, tanba tuir Komité Ezekutivu no Komite 12 Novembru nian katak rezultadu husi Max Stahl nia serbisu halo kobertura ba filmajen masakre 12 Novembru mak haruka ba iha rai liur, ho ida ne’e mak maun Jose Ramos Horta iha tempu ne’ebá hanesan frente diplomátiku, uza ida ne’e hodi halo kampaña atu hetan apoiu husi nasaun sira konaba Timor nia independénsia ne’e.
“Depois ida ne’e mak maun boot nain rua entrega ba iha estadu. Tuir planu ita sei entrega ba iha Primeiru Ministru, Taur Matan Ruak, maibe depende tanba oras ne’e daudaun Parlamentu Nasionál hala’o hela debate Orsamentu Jerlál Estadu nian, maibe ita husu Ministru Fidelis Manuel Leite Mangalhães, bele reprezenta governu ofisiál para atu simu sinzas Max Stahl nian,” nia hakotu.
Christopher Winner, koñesidu liu ho naran Max Stahl, moris iha Reinu Unidu iha loron 06 dezembru 1954, hanesan responsável ba filmajen no imajen Masakre Santa Cruz, ne’ebé akontese iha loron 12 Novembru 1991. Max Stahl, hakotu iis iha loron 28 outubru, iha Brisbane, tanba moras ne’ebé nia sofre kleur ona.
