Reportajen Santina Lucia da Costa
Ministru Administrasaun Estatál (MAE) ho Komisaun Nasionál Eleisaun (CNE) informa pontu situasaun preparativus eleisaun Prezidensiál 2022, ne’ebe sei aumenta sentru votasaun 1200 porvolta 27% ba Prezidente Repúblika Dr. Francisco Guterres Lu Olo, maibé Xefe Estadu preokupa taxa partisipasaun eleitór sira iha eleisaun Prezidensiál.
Hafoin enkontru, Ministru Administrasaun Estatál (MAE), Miguel Pereira de Carvalho informa ba jornalista katak, MAE ho CNE informa ba Prezidente Repúblika kona-ba pontu situasaun preparativus eleisaun Prezidensiál 2022 nian, eleisaun prezidensiál ba dala lima, STAE sei halo esforsu hotu, garante katak eleisaun prezidensiál ne’ebé sei halo iha 2022 ne’e, sei halo forma ida ne’ebé maka transparente, parsialidade no neutralidade.
“STAE nu’udar órgaun administrasaun eleitorál sei halo esforsu hotu para garante eleisaun prezidensiál ne’ebé sei halo iha 2022 ne’e, sei halo forma ida ne’ebé maka transparente, parsialidade no mós neútralidade.” Hateten, MAE, Miguel Pereira de Carvalho ba jornalista sira iha Palásiu Prezidensiál, Nicolau Lobato, Bairo-Pite, 13/12.
Miguel dehan Prezidente Repúblika mós preokupa tebes ho taxa partisipasaun eleitór sira nian iha eleisaun prezidensiál, tanba iha tinan 2018, partisipasaun iha ita nia populasaun sira ne’e iha de’it 80.86% , porvolta 19 % eleitór sira maka la ba vota. Entaun governu informa ba Prezidente Repúblika katak, atu aumenta tan sentru votasaun ho estasaun votus iha territóriu laran tomak.
Governante ne’e afirma, Iha tinan 2018 governu tau de’it sentru votasaun hamutuk 885, mais ba eleisaun prezidensiál tinan 2022, sei aumenta sentru votasaun 1200 porvolta 27% husi sentru votasaun tinan 2018 nian, estasõens votus mós STAE propoin ona atu hasa’e husi 1160 iha tinan 2018, ba to’o iha 1500 iha tinan 2022, portantu momentu ida 23 % estasõens votasaun.
“Objetivu prinsipál mak atu hakbesik liu tan sentru votasaun no ba ita nia eleitór sira, tanba durante eleisaun ikus ne’e la konsege ba to’o iha vota fatin, ho ida ne’e taxa partisipasaun tinan 2018 to’o de’it 81 %,”akresenta, Miguel Pereira.
Nia realsa, Pandemia covid-19, estratéjia planu STAE para garantia ema labele halibur barak iha sentru votasaun no ezatamente sei aumenta 1200.
Iha tinan 2017 eleitór sira iha de’it 784.286, ikus liu dadus ne’ebé STAE fó sai depois halo resenseamentu atualizasaun baze dadus STAE rejista ona eleitór hamutuk 850.487 eleitór, kompara ho eleitór tinan 2017 ho ohin loron nian, iha tan aumenta por volta 66.202 eleitór.
Miguel konklui katak iha faze ne’e hahú konklui ona rekrutamentu ba brigadista sira hamutuk 1200, no iha tan tuir sei rekruta tan 15 mill ofisiais eleitorais, para bele serbisu iha sentru votasaun.
Iha fatin hanesa, Prezidente Komisaun Nasional Eleisaun (CNE), José Agostinho da Costa Belo Pereira, hateten CNE halo serbisu ezersísiu uituan, serbisu hamutuk ho Autoridade Munisipiu, Seguransa, Prezidente Autoridade no komunidade tomak, oinsa mak atu bele halo avaliasaun ida kona-ba eleisaun sira ne’ebé liu tiha ona, no sira nia espetativa ba oin ne’e saida mak bele halo, liuliu liga ho eleisaun ne’ebé kualidade.
“Prezidente Republika fó hanoin ba CNE maka, eleisaun ida mai ne’e iha paz nia laran, preparasaun tenki di’ak, tanbe ne’e hanesan orgaun CNE tenki serbisu ho di’ak, hatudu matoridade, neútralidade oinsa mak atu asegura eleisaun, rezultadu mai ne’e sai rezultadu di’ak ba timoroan hotu, ita hakarak Prezidente ida ho prefil ne’ebé di’ak.” Dehan José Agostinho da Costa Belo Pereira.
