Home Notisia Feto Rural nia Lian Iha Media Menus, Zevonia: Jornalista Iha Knaar Hodi...

Feto Rural nia Lian Iha Media Menus, Zevonia: Jornalista Iha Knaar Hodi Fo Spasu Ba Sira

395
0
Panelista Zevonia Vieira hosi AJTL, Natalino Guterres Prezidente Hatutan no Genoveva Soares, Diretora Novalo Unipesoal. Lda. [Foto: Santina Lucia da Costa | 09.03.2020]

Reportazen Santina Lucia da Costa

Embaixada Australia iha Timor-Leste selebra loron feto mundial hamutuk ho sosiadade sivil, governu no mos agencia internasional sira iha Timor. Iha tema tinan ida ne’e foka konaba Atinji Igualdade iha Dekade Foun.

Iha evente refere, panelista sira mai ho sira nia esperiensia, ne’ebe mai hosi seitor oin-oin, hodi fahe saida mak sira halo ona, dezafius ne’ebe sira hasoru no saida inspira sira hodi kontinua halo advokasi ba iha promove igualdade jeneru.

Panelista Prezidente Asosiasaun Jornalista Timor Lorosa’e [AJTL], Zevonia Vieira iha aprezentasaun hateten dezafius ne’ebe feto barak sei hasoru iha instituisaun media mak numeru xefe redasaun, director no editor sei domina hosi mane, ida ne’e hamosu obstaklu tanba desizaun ka politika redasaun mai hosi deit prespektiva mane nian deit.

Zevonia hateten responsabilidade ne’ebe halao nudar Prezidente AJTL, esforsu an hodi halo aprosiamasaun ba insituisaun media, no serbisu hamutuk ho Konselho Imprensa Timor-Leste, atu bele hakbiit feto iha mundu jurnalismu, oinsa sira abilidade no kapasidade hodi bele lidera instituisaun media sira, atu nune’e politika redasaun bele mai hosi mos prespektiva feto nian no mos mai hosi mane.

“Iha periodu ne’e sei foka ba kapasitasaun jornalista sira, oinsa sira iha konnesementu konaba Jurnalismu sensibilidade ba jeneru, atu nune’e bainhira halo kobertura iha issue saida deit, bele reprezenta prespektiva hosi feto no mane, no liu-liu oinsa mos fo spasu ba grupu vulneravel no marjinal atu hatoo sira nia lian iha media, tanba bainira foka deit hosi prespektiva mane nian, dezenvolvimentu sei la balansu”, hateten Zevonia

Liu hosi esperiensia ne’ebe mak Zevonia halo ho ekipa jornalista sira iha media online Neon Metin, bainhira ba halo kobertura iha area rural, liu-liu iha Suku Ura-hou Municipio Ermera, hasoru katak feto barak sei moris vulneravel, sira la asesu ba merkadu hodi faan sira nia protudu agrikultura, tanba Estrada ata, sira labele asesu ospital ne’ebe besik, labele asesu edukasaun iha nivel superior tanba tenke ajuda inan aman sira iha uma no tanba mos kultura patrikal.

“Ida ne’e mak problema boot ida, inspira hau atu foka sai problema ne’ebe feto iha area rural sei hasoru, sira la asesu informasaun iha media, sira rasik ladun hetan espasu iha media hodi hato’o sira nia hanoin. Nudar jornalista iha responsabilidade hodi rona sira nia lian, no hatoo sira inspirasaun iha media, hodi nune’e estadu Timor bele hatene”, hateten Zevonia

Zevonia mos dehan media iha papel importante, laos deit publika informasaun maibe oinsa mos halo edukasaun sivika hodi muda ema nia hahalok, eduka no hasae ema nia konnesementu. Liu hosi Media mudansa bele akontese, bainhira uza media hodi halo advokasia, liu-liu ba grupu vulneravel no marjinal.

Iha eventu ne’e panelista seluk mai hosi Prezidente Hatutan, Natalino Guterres no Diretora Novalo Unipessoal. Lda, Genoveva Soares no Inspektora Iha Ministeriu Publiku, Zelia Trindade.

LEAVE A REPLY

Please enter your comment!
Please enter your name here