Reportajen Juvinal Cabral dos Santos
Relasiona ho menus manorin sira iha Eskola Ensino Báziku Filial (EBF) Abo-Lir, Postu Administrativu Quelicai, Munisipiu Baukau, tanba manorin iha nain 3 deit, sira tenke fahe Primeiru ano too sestu ano, sai sala tolu de’it, no inklui (gabung) ho Ensino Pre-eskolar (EPE) Abo-Lir hanorin hamutuk, problema ne’e akontese kedas iha tinan 2018.
“Ami presiza tebes professor tanba ami nain tolu de’it, ami nia professor eskola Ensino pre-eskolar (EPE) Abo-Lir mos para tiha ona, tanba sira nia diploma sekundária de’it, ami nain tolu de’it ema ida hanorin sala rua aumenta ho TK,” dehan Koordenadora Eskola Ensino Baziku Filial (EBF) Abo-Lir Ricardina dos Santos iha nia edifisiu ba jornalista Neon Metin iha Segunda (19/02/2024)”
Koordenadora ne’e hatutan sira enfrenta tebes problema iha prosesu aprendizajen, manorin ida hanorin klase rua iha salaun ida, nune’e sala ida primeiru ano segundo ano hamutuk tan ho pre-eskolar ne’ebe ativu, terseiru no kuartu ano aula ida, Kintu ho Sestu ano tama hamutuk, nune’e husi primeiru ano too Sestu ano, fahe tiha sala tolu hodi hafasil manorin sira hodi kontrola estudante.
Koordenadora Eskola Ensino Baziku Filial (EBF) Abo-Lir Ricardina dos Santos. [Foto: Juvinal | 22.02.2024]
“Dalaruma ami hanorin oras rua de’it, tanba labarik mos barak, materia mos barak ami la hanorin hotu tanba ami nain tolu de’it, maske eskola foun iha leten, maibe ami nain tolu de’it labele aguenta para uja sala ne’eba, dehan Ricardina” dehan Koordenador
Manorin ne’e husu ba Ministériu Edukasaun, atu aumenta sala tolu ho tan edifisiu ba manorin sira no ‘toilet’ inklui aumenta manorin sira atu nune’e ajuda hanorin, hanesan Kintu no Sestu ano nia professora tuir kursu Portuguesa husi Segunda too Kuarta, nune’e semana ida abandona estudante sira loron tolu
Ricardina mos informa katak manorin nain 4 la hanorin ona, tanba nain rua husi ensinu pre-eskolar nu’udar kontratadu, maibe foin lalais sira nia kontratu labele kontinua tuir desizaun husi Ministeriu Edukasaun foin lalais ne’e, no nain rua seluk volunatiru iha Ensinu Baziku maibe kestaun ekonomia tenke para, problema refere fo impaktu boot ba estudante sira, tanba eskola EPE Abo-Lir taka, nune’e sira balun ativu eskola hamutuk fali eskola EBF Abo-Lir
Total estudante EBF Abo-Lir hamutuk nain 90 bainhira eskola EPE Abo-Lir taka estudante ativu nain 19 mak kontinua tama aula ho ensinu baziku Primeiru no segundo ano hodi tuir prosesu aprendizajen
Iha fatin hanesan Manorin Pedro Cabral nu’udar mos veteranu dezmobilizadu ho kódigu (Maquino) haktuir nia hanorin iha EBF Abo-Lir dezde 2006, Primeiro governu konstitusionál too ohin loron nia haree eskola ne’e enfrenta problema boot, manorin menus dezde tinan 2018 too agora, iha tinan 2015 ho 2016 ne’e manorin nain rua mak mate, no iha tinan 2018 ne’e manorin Koordenadór moras foin lais 2023 hakotu nia is iha Hospital Nasional Guido Valadares (HNGV)
Manorin Pedro Cabral. [Foto: Juvinal | 22.02.2024]
“Ha’u hanesan veteranu ida haree tuir professor limitadu tebes duni nune’e difikulta ensinu aprendizajen ba estudante sira,” dehan Pedro Cabral (Maquino) iha EBF Abo-Lir (19/02/2024)
Veteranu ne’e hatutan dadaun ne’e nia idade 69 anos, nia hakarak deskansa ona maibe problema manorin la too, se nia deskansa tiha se mak atu hanorin, nia triste abandona oan sira.
“Ita nia oan ne’e mak futuru nasaun nia, ami iha ai laran uluk iha tempu Portugues eskola too de’it Kuarta klase tanba ida ne’e mak ami kaer kilat hasoru kolonialista Portugues ohin loron ita ukun an maibe agora problema boot mak edukasaun,” dehan Pedro (Maquino)
Manorin ne’e husu ba joven sira iha area foho Matebian hun, ne’ebé remata ona iha universidade ne’e pelumenus konkore vaga manorin nian, nune’e ajuda hanorin alin estudante EBF Abo-Lir,
“Ha’u atu rekomenda ba ministra edukasaun dezde 2018 too agora manorin ami nain tolu de’it, nune’e ha’u husu se bele haruka manorin balun mai agora atu hanorin ita nia oan Sira matenek para kaer nasaun ida ne’e,” dehan Pedro Cabral (Maquino).
Total estudante total 90 iha Eskola Ensino Báziku Filial no pre eskolar nain 19 pesoas, nune’e total ativu estudante hamutuk 109
