Home Feature Covid-19 no EE, Rosalina Luta Iha Dalan Ninin Hodi Buka Moris Hosi...

Covid-19 no EE, Rosalina Luta Iha Dalan Ninin Hodi Buka Moris Hosi Faan Maskra

382
0
Rosalina Freitas faan maskra, pulsa no sigaru durante EE. [Foto: Santina Lucia da Costa | 17.04.2020]

Reportazen Santina Lucia da Costa

Virus Corona nudar beneno boot ba ema nia vida, halo ema tauk, paniku no ikus tenke moris susar nia laran.

Corona laos deit fo moras ba ema, maibe ho Corona nia prezensa iha mundu ne’e, tenke hamate ekonomia ema ida nian, sa tan ba ema ne’ebe kbiit laek.

Bainhira Corona hakat nia ain iha rai doben ida ne’e, iha tempu ne’eba kedas Prezidente da Republika dekreta kedas Estadu Emerjensia, ho objetivu atu hamenus risku ema ida nia vida, atu kona virus Corona, maibe iha parte ida ema kbiit laek sira tenke hasoru susar, tanba labele hetan osan netik, hodi sustenta sira nia moris.

Rosalina Freitas, idade 30, nudar estudante iha Universidade Oriental Timor-Lorosa’e [UNITAL], Fakuldade Teknika, Departamentu Planolojia, agora dadaun finalista, lolos agora atu tun ba Baze halo estajiu sosial, maibe tan deit Estadu Emerjensia, entaun sira pendente.

Estadu Emerjensia halo Rosalina tenke foti desizaun, oinsa nia bele kontinua nia moris iha situasaun moras virus Corona ne’ebe sai ameasadu. Rosalina foti inisiativa hodi faan maskra, pulsa telephone, sigaru iha loza W-Four no Meimart Audian nia oin.

“Maskra agora dadaun ami fa’an ne’e, ami lao sai loja tama loja, tanba loja agora taka maibe bainhira ami haree loja nia odamatan ki’ik loke, entaun ami tenke hamriik ho haraik-an husu sira, karik iha sira fo ami hola, maskra box ida $2 dollar no ami fa’an fali ba $ 2.50 cen, dalaruma hatun ba $ 2.25 cen, atu nune’e hetan netik uituan, osan inan labele lakon. Maskra ida de’it $0.50 cen no hau fa’an mos pulsa ho sigaru”, tenik Rosalina Freitas ba Neon Metin, iha loron 16/4/ Audian-Dili.

Rosalina konfesa katak antes estadu emerjensia kada loron nia bele hetan $100 no iha tempu agora hetan deit $40.00 to’o 50.00 deit.

Rosalina hatene aplika estadu emerjensia hodi nune’e populasaun bele hela hakmatek iha uma, hodi preven an hosi moras virus Corona, maibe iha parte ida nia tenke lakon rendimentu, tanba deit halo negosiu kiik iha dalan ninin mak tulun Rosalina hodi hatutan nia moris ba oin.

Bainhira Rosalina faan sasan iha dalan ninin, nia sempre hanoin atu kontinua prevene nai an katak fase liman bebeik ho sabaun, uza maskra no halo distansia fiziku metru ida.

Bainhira Neon Metin husu hetan informasaun konba oinsa preven-an hosi virus Corona, hosi ne’ebe? Ba Neon Metin Rosalina hateten, informasuan hirak ne’e hetan hosi Ministeriu Saude. liu hosi poster sira ne’ebe mak taka iha dal-dalan, liu husi media sosial, Televizaun sempre fo sai, nune’e mós informasaun ne’ebe parte seguransa sira lao tun sae iha ne’e, sempre fó avizu.

Rosalina mos dehan maskra ne’ebe mak nia uza, bainhira fila ba uma nia fase, habai no estrika atu nune’e bele hamate bateria ne’ebe kait hela iha maskra.

Hanesan ema kbiit laek ida, Rosalina ne’ebe mak sei kontinua nia estudu iha universidde husu ba Ministeriu Saude atu kontinua sosializa no halo edukasaun sivika ba komunidade sira, halo aprosimasaun ba komunidade, atu sira bele komprende klean liutan oinsa atu prevene an hosi virus Corona.

LEAVE A REPLY

Please enter your comment!
Please enter your name here