Reportajen SIlvino Freitas
Asosiasaun Jerasaun Patriota realiza reflesaun bá esisténsia tinan 10, husi esisténsia ne’e sira ho misaun ida atu kontribui ba paz no estabilidade kosulida joven sira hodi kontribui ba paz no estabilidade, jerasaun patriota mós hakarak veteranu funu nain sira nafatin hamutuk ho unidade sai lalenok ba sosiedade problema nasaun nian ne’e hanesan Trabalho da Casa (TPC) ida ba sira atu halo reflesaun, nune’e mós joven foin sa’e sira nafatin infrenta krize moral no edukasaun atu kontribui ba paz no estabilidade inklui hanesan futuru nasaun nian.
Prezidente Komisaun Organizador Hermínio Xavier hanesan mós membru jerasaun patriota dehan, esisténsia Asosiasaun Jerasaun Patriota ne’e ho intensaun ida atu kontribui asaun ruma ba nasaun Timor Leste liuliu kria paz no konsulida joven sira atu kontribui ba nasaun nian dezenvolvimento ho di’ak katak justisa ba ema hotu hotu hamriik iha lia loos la tolera ba aktu krime no injustisa inklui violénsia ne’ebé akontese iha Timor Leste nomós aktu sira ne’ebé liga ba ukun nain sira ne’ebé hamosu korupsaun nepotizmu ne’e sai mós atensaun sira nian atu bele ko’alia liuliu prosesu dezenvolvimento ninia andamentu ba oin.
“Ami iha prinsípiu ida atu halo buat ruma ami lakohi atu hateten ba públiku, maibé aproveita biban ne’e atu fahe mós buat balun jerasaun patriota nia esisténsia tinan 10 ami la halo buat barak maibé buat kikoan balun, iha ami nia kontribuisaun ami halo ona ami nia asaun solidaridade ba ami nia ran maluk sira ne’e ami la husu tulun husi organizasaun ka intituisaun estadu sira maibé ami ne’e husi ami nia kbiit rasik no asaun karidade ne’e la’ós iha Dili maibé iha mós munisípiu balun ba ami nia maluk sira ne’ebé ema la tau matan ba sira” dehan jerasaun patriota Herminio Xavier iha salaun auditoria Kuartel Jerál F-FDTL Fatuhada, (23/05).
Nia dehan tan, Jerasaun Patriota ho esperánsa ba futuru Timor Leste tenke la’o ho estbilidade moris iha paz no sira iha espetativa ida katak aman veteranu sira tenke unidade bele diferente iha polítika partido hanoin maibé nasaun ne’e sira maka harii no hahú tanba ne’e sira mak tenke sai lalenok ba sosiedade husu sira nia prinsípiu katak Timor Leste tenke ukun an no povu tenke moris di’ak.
“Infelizmente tinan 23 ona ita ukun an ita sei haree iha sorin sorin sei iha problema barak ne’e hanesan servisu uma nian ba aman veteranu sira liuliu aman sira ne’ebé dadaun ne’e kaer ukun, ami hakarak aman sira tenke hamutuk labele haketak malu” dehan Hermínio.
Nia konklui, situasaun estabilidade joven sira nian ne’ebé la’o dadaun ne’e jerasaun patriota konsidera joven sira infrenta hela krize hodi kontribui ba instabilidade polítika iha nasaun Timor Leste, joven sira menus tebes atu asesu ba edukasaun no informasaun nune’e joven sira la duun komprende klean kona-ba oinsá atu kria paz no estabilidade iha nia rain rasik, joven sira devia rona inan aman sira katak sira mak futuru nasaun nian maibé joven sira mai ho hanoin la hanesan nune’e hasoru krize atu kontribui ba unidade no estabilidade maibe inklina fali iha grupu oin-oin, hodi uza sala grupu sira ne’e kria fali instabilidade iha nia rain rasik, nune’e joven sira ne’ebé instrumentaliza an iha grupu sira hodi halo tendensia iha atu halo funu de’it ne’ebé la’ós ema seluk maibé hasoru fali nia maun alin rasik.
