Reportajen Joselina dos Santos
Primeiru Vise Sekretáriu Jerál Partidu Demokrátiku (PD) hamutuk ho estrutura PD, submete ona lista kandidatura deputadu no deputada ba iha Tribunal Rekursu (TR), hodi bele hetan legalizasaun atu kompete iha eleisaun parlamentar tinan 2023. No iha lista ne’e deputadu no deputada ne’e maioria jerasaun foun deit.
“Ohin ami mai hodi submete lista kandidatu ba deputadu sira ba Parlamentu Nasional, ami submete ona, ne’e hanesan aktu komplementu rekijitus legais ne’ebe vigora iha Timor-Leste. Nune’e Ami submete ona Tribunal Rekursu mak sei halo verifikasaun entaun ami prepara atu kompete iha eleisaun parlamentar”, dehan Arcanjo Leite iha edifísiu Tribunal Rekursu Kaikoli, Kuarta 15/03.
Nia hatutan, tuir lei lista kandidatu sira ne’e 65 efetivu no submete 25 hamutuk 90 pessoas, entaun feto nia partisipasaun iha partidu demokratiku iha ne’e 30%. Tanba partidu ne’e harii durante 22 anos entaun iha lista kandidatura ne’e maioria jerasaun foun. Nune’e PD prontu kompete iha eleisaun parlamentar no PD mós preparadu banhira povu fó konfiansa atu kaer ukun.
“Ha’u husu ba kompaneiru no militantes simpatijantes estrutura partidu demokratiku iha Timor laran nomós iha estranjeiru lalika ragu no duvidas hodi fó konfiansa ba partidu demokratiku tanba 22 anos ona ami eziste, entaun ami iha eperensia naton tantu posizaun no partidu ne’ebe envolve iha ukun. Espera katak povu sei fó konfiansa ba PD nune’e bele hamutuk ho parseiru no aliadu sira hodi kaer ukun”, nia husu.
Nia afirma programa PD antes ne’e preparadu ona hein fahe ba militante sira nomós apoiante foun sira katak PD sei la ba ko’alia insulta malu iha terenu maibé PD só faan deit sira nia programa.
