Reportajen Joselina dos Santos
Prezidente Juventude Partidu Osverdes de Timor, ohin Submete ona lista kandidatura deputadu no deputada hamutuk 90 ba iha Tribunal Rekursu (TR), atu kompete iha eleisaun parlamentár tinan ne’e, no iha lista ne’e 65 efetivu no suplente 25.
Hafoin aprezenta lista kandidatura, Prezidente juventude Partidu Osverdes de Timor, Antonio Lela Huno Cruz hateten, ohin data ikus atu aprezenta lista kandidatura partidus politikus sira hodi konkore iha eleisaun parlamentar 2023 nian, ne’e duni partidu osverdes aprezenta lista hodi bele kumpri lei ba eleisaun nian.
“Ami aprezenta 65 efetivus no suplentes 25 hamutuk 90, no iha lista kandidatura ne’e feto nia partisipasaun 30%, nune’e ami prontu ona atu kompete, tanba antes ne’e ami hamoos ona tos no kuda ona batar, ne’e duni agora ne’e hein ba ku’u atu nune’e bele forma governu foun”, dehan, Prezidente juventude Partidu Os Verdes de Timor, Antonio Lela iha edifisiu TR Kaikoli, kuarta 15/03.
Prezidente Partidu Osverdes husu ba joven dezempregu sira hodi vota ba verdes, tanba tinan 20 ona Timor dezempregu, joven barak mak la eskola no la servisu, ho ida ne’e mak partidu verdes hakarak hamriik hodi defende joven dezempregu sira. Tanba verdes ne’e signifika buras matak no malirin, maibé joven barak agora namlaik, joven la buras, manas no violénsia mosu iha fatin-fatin, tan ida ne’e mak verdes hakarak lori buras matak malirin ba joven sira.
“Ha’u husu ba joven sira no família verdes nian iha rai liur no rai laran, atu kontinua konsolida ita nia forsa hodi hetan vitoria iha eleisaun tuir mai, Partidu Verdes laos komentar deit, maibé pratika katak lista deputadu numeru 1 mak Tomas Aparisio ne’ebe ho kondisaun difisiente matan, nia mak sei sai ibun matan no lian ba ema defisiénsia sira iha Timor laran,” nia konklui
