Home Notisia CIJK Ho Familia Matebian Tau Cruz Iha Rate, Francisco: Ami Fiar Matebian...

CIJK Ho Familia Matebian Tau Cruz Iha Rate, Francisco: Ami Fiar Matebian Mate Ho COVID-19

2196
0
familia matebian tau cruz iha Metinaru. [Foto: David da Costa | 20.04.2021]

Reportazen David da Costa Gusmao*

Familia matebian Francisca Gama (FG) ho ekipa saude no Sala Situasaun  Centro Integradu Jestaun Krize (SS-CIJK) halao serimonia misa agradesimentu hodi tau ai funan, sunu lilin no tau cruz iha matebian nia rate iha Metinaru tuir kultura matebian nian.

“Ohin CIJK hamutuk ho ami familia halibur malu iha semiteriu matebian Francisca Gama nian, hodi tau ai funan, sunu lilin no tau mos nia cruz tuir kultura ne’ebe mak ami iha,” esplika familia matebian Francisco Ximenes iha semiteriu COVID-19 nian, iha Metinaro,20/04.

Nia haktuir familia simu ho liman rua maske ho matan wen, no familia fiar ba Dotor sira katak matebian Francisca Gama mate ho COVID-19.

“Ami hakruk ba Protokolu Organizasaun Mundial Saude (OMS) nian, ami nunka halo protesta ba governu, Francisca Gama mate ho COVID-19 no moras komplikadu maibe ami simu ho liman rua, no iha ema balu dehan iha tempu badak nia laran ami familia sei foti fali matebian nia restu mortais ida ne’e la loos, ami sei foti maibe laos agora, tinan 4 ou 5 mai mak ami sei foti hodi ba halot iha nia moris fatin tuir ami nia kultura,”nia subliña

Nune’e Familia husu governu atu kria netik serku ida, hodi proteje matebian nia rate husi animal sira.

Iha fatin hanesan, Koordenador Estadu Maior Sala Situasaun Centro Integradu Jestaun Krize, Donaciano Costa Gomes “Pedro Klamar Fuik” hatete, situasaun ida ne’e halo familia no ema hotu laran moras, maibe ho laran luak familia nian hakarak halo diak ba ema barak nia diak, ho nune’e familia koopera diak ho governu, hodi halot Francisca iha semiteriu foun Metinaru

“Ami hakruk tebes ba familia, hau hodi naran CIJK nian hakarak husu deskulpa ba matebian Fransisca Gama no familia matebian nian, tamba halot nia la tuir ita nia uzus kustume tradisaun ka kultura nian,” tenik Klamar Fuik.

*(David da Costa Gusmao nudar estundate UNTL ne’ebe halo estajiu iha Neon Metin)

Print Friendly, PDF & Email

LEAVE A REPLY

Please enter your comment!
Please enter your name here