Reportajen David da Costa Gusmao
Autoridade komunitariu Suku Manu Mera postu Administrativu Turiskai, munisípiu Manufahi sente triste tanba delegadu no delegada sira la simu sira nia osan intensivu, autoridade lokál husu ba governu iha futuru bele hadi’a sistema ida ne’e.
Autoridade komunitária Suku Manu Mera, Isabel De Jesus deklara iha 2016 governu kria ona sistema Eleisaun ba iha xefe suku, xefe aldeia no delegada/ elegadu sira hotu, maibé hanesan autoridade sente triste tanba delegadu/delegada sira la simu sira nia intensivu.
“Ba ami Xefe Suku no Xefe Aldeia simu ona ami nia intensivu, maibé triste liu ba delegadu feto sira ne’ebe mak la simu sira nia intensivu,” dehan Autoridade Komunitária suku Manu Mera Isabel, iha Salaun Parokiál Manufahi, kuarta 17/11.
Nia husu governu ba futuru bele iha mudansa no muda tiha sistema ida agora ne’e, no bele kria fali sistema ida uluk iha 2012 to’o mai iha 2015 ho sistema pakote.
Hatán ba preokupasaun ne’e Vise Ministru Administrasaun no Estatál, Lino De Jesus Torresão hateten konaba delegadu ho delegada sira nia intensivu ne’e bazeia ba sira nia prezensa, fulan ne’e nia laran sira halo enkontru mak sira foin hetan sira nia intensivu $54.00.
Konaba ida ne’e iha VII governu nia tempu, agora tuir fali mai Ministériu Administrasaun Estatál aprezenta dekretu lei ida halo oinsa mak fulan fó intensivu $30.00 ba sira.
Nia dehan ida ne’e deferénsia boot, tanba uluk tinan ida nia laran, sira hetan deit $90.00 deit, mais agora ne’e, sira fulan ida $30.00 no tinan ida sira bele hetan $360.00.
“Ami sei buka meius hotu atu bele responde ba preokupasaun suku ninia. Tanba Suku maka governu central nia ain liman,” nia hakotu.
Mensajen ikus Prezidente Repúblika, Dr. Francisco Guterres Lu Olo iha enserramentu ba diálogu ne’e, governu iha ninia kompromisiu rasik , ne’ebé ajusta tama hotu saida maka komunidade Manufahi nia preokupasaun, hato’o ohin daudauk, governu sei buka oportunidade atu fó resposta ho korreta ba situasaun sira ne’ebé mak komunidade hasoru.
