Home Notisia Livru Buibere Hamriik Ukun Rasik-an, PR: Buibere Hatene Foti Inisiativa no Organiza-an

Livru Buibere Hamriik Ukun Rasik-an, PR: Buibere Hatene Foti Inisiativa no Organiza-an

151
0
Prezidente Republika lansa livru Buibere Hamrik Ukun Rasik-an. [Foto: Santina Lucia da Costa | 11.06.2021]

Reportajen Santina Lucia da Costa

Prezidente Repúblika Dr. Francisco Guterres Lu-Olo halo lansamentu ba livru ho titulu “Buibere Hamriik Ukun Rasik-an”,  no iha biban hanesan komemora mos levantamentu Marabia, no kondekorasaun ordem Timor-Leste ba saudoza ‘Bi-kiak’ iha loron Kinta-feira, 10/6.

“Ho laran-ksolok tebes no orgullu boot mak ha’u lansa ohin obra importante ida, la’ós de’it ba ita-nia feto ass’wain sira, maibé ba mós ita hotu, jerasaun ohin nian no aban bairua nian”, dehan Prezidente Republika.

Nia dehan livru sura istória luta barani feto sira-nian, lansa iha Palásiu Prezidensial Nicolau Lobato asosia ho data importante tebes ida, iha ita-nia Luta Libertasaun Nasional, levantamentu  Marabia, iha 10 Juñu 1980.

Lu Olo haktuir husi ita-nia istória rasik, mak ita bele hasai lisaun oioin ba ita-nia moris ohin loron no ba abanbairua. Istória sura iha livru “Buibere Hamriik Ukun Rasik An” haree ba pasadu ida ne’ebé nakonu ho barani, determinasaun no dedikasaun, maibé ho mós halerik oioin ne’ebé sei hakanek hela sobrevivente sira.

Livru ne’e mai husi inisiativa Organizasaun Popular da Mulher Timor (OPMT), nu’udar organizasaun massas FRETILIN nian, maibé reflekte feto hothotu ninia kontribuisaun ba luta, husi tinan 1974 to’o 1999.

Ho kontestu koletivu ida ne’e  mak  líder istóriku hothotu fó apoiu total no inkondisionál,  hahú ho  festa angariasaun fundus iha tinan 2010 no hetan mós apoiu finanseiru  husi Gabinete Primeiru-Ministru. Organizasaun oioin, maluk timoroan no belun barak tebes, inklui emprezáriu sira, hatán ho apoiu di’ak tebes ba inisiativa ida ne’e.

“Ho haksolok boot mak ha’u haree katak ekipa hothotu, harii ba produsaun livru ne’e, kahor feto  ho  mane, jerasaun tuan ho jerasaun foin-sae.” Akresenta Lu-Olo.

Xefe Estadu dehan dalan ida ne’e permite fahe esperiénsia no tau hamutuk matenek ida-idak nian, husi jerasaun oioin no konsege duni prodús obra koletiva ida ne’ebé sura no interpreta istória luta libertasaun nasionál ho perspetiva timoroan sira-nian, ho apoiu husi ita-nia belun boot tolu, ho fuan Timor Nugroho Katjasungkana, Titi Irawati no Kelly Silva.

Lu-Olo hatutan obra ida ne’e fó-sai ba dahuluk, no klean tebtebes, saída loos mak feto timoroan sira halo ho brani, nu’udar indivídu ka liuhusi organizasaun polítiku-partidária ka lae,  husi 1974 to’o 1999 iha rai-laran no iha rai-li’ur.                                                                                                                                                                                                                                                                                                                                           Nia hateten, Ita-nia buibere sira hatene duni foti inisiativa, organiza-an ho espíritu kriativu no matenek rasik,  hatene mós oinsá lidera knaar oioin ne’ebé dala barak envolve mós mane sira, tuir kbiit ho meiu sira ne’ebé iha, hodi partisipa iha prosesu luta libertasaun Pátria iha fente luta hothotu.

Nune’e obra ne’e  reflekte importánsia papel feto sira-nian iha prosesu tomak luta nian, iha Frente tolu: Armada, Klandestina no Esterna.

Print Friendly, PDF & Email

LEAVE A REPLY

Please enter your comment!
Please enter your name here