Reportajen Santina Lucia da Costa
Diretór Ezekutivu Telkomcel, Dedi Edwar Ambarita hateten Telkomcel nia komprimisu apoia Governu no Estadu Timor-Leste hodi promove setor Turizmu no kafé Timor original iha liur.
Diretor Ezekutivu Telkomcel, Dedi Edwar Ambarita hateten asuntu ne’e ba jornalista sira hafoin hasoru malu ho Prezidente Republika, Dr. Jose Manuel Ramos Horta iha Palasiu Prezidensial Nicolau Lobato Bairu-Pite, Dili, Kuarta-Feira.
Diretor Ezekutivu Telkomcel, informa, Atualmente Telkomcel nia funsionáriu sira ne’e 95% mesak Timoroan, hanesan Telin Grupu, apoiu programa Governu Timor-Leste, liu-liu kona-ba Turizmu ida ne’e mak Telkomcel nia komprimisiu.
Dedi Edwar Ambarita, dehan, Alende promove setor turizmu Telkomcel mós hakarak promove kafé Timor, ho Telkomcel nia parseiru sira ne’ebé espalla iha nasaun hotu hodi tulun halo promosaun ba kafé Timor.
“Kona-ba promove kafé Timor no Telekomsel sei koordena ho sira nia ajensia iha nasaun 10 hanesan iha Taiwan, Hongkong, Singapura, Myanmar, Amérika, Sidney-Australia no Dubai, ami kompromete promove kafé Timor.” Hateten, Dedi Edwar Ambarita, 22/6.
Nia hatutan Telkomcel iha disponibilidade atu apoia programa Governu Timor-Leste nian, liu-liu inisiativa sira kona-ba Turizmu, no produtu orijinál Timor-Leste nian ba mundu.
Durante Telkomcel investe iha Timor tinan 10, la’ós fó de’it kapasitasaun ba rekursu umanus, maibé mós konstrui ona infraestrutura sira, no kontinua halo hela serbisu hodi moderniza rede internet tanba investe iha teknolójia presija fundus ne’ebé boot no buat hotu presija iha prosesu. No dadaun ne’e, Totál kliente ne’ebé uza serbisu Telekomcel iha Timor-Leste hamutuk 300.000.
Nia haktuir Prezidente Repúblika sente haksolok no esplika nia esperiensia kona-ba uza serbisu Telekomunikasaun liu-liu kona-ba artifisial intelejen no Telkomcel mós prontu atu apoiu inisiativa Xefe Estadu nian.
