Home Justisa Julgamentu RD Via Video Teleconference, JSMP Husu Tribunal Haree Velosidade Internet no...

Julgamentu RD Via Video Teleconference, JSMP Husu Tribunal Haree Velosidade Internet no Ekipamentu

600
0
Diretora Executiva JSMP, Ana Paula Marcal. [Foto: Francisco JDA | 19.06.2020]

Maski lei fo dalan atu halo julgamentu liu hosi video conference maibe tribunal la haree didiak velosidade internet no ekipamentu. Advogado arguido hatete katak prosesu julgamentu la efetivu tan ne’e husu julgamentu adia ba 5 Julho.

Diretora JSMP, Ana Paula Marcal esplika liu hosi entrevista via WhatsApp, ohin (10/06), katak meiu ida ba halo julgamentu mak liu hosi video conference maibe presipa iha internet ho velosidade diak no ekipamentu qualidade.

“Video teleconference nudar meiu ida hodi hatan ba situasaun serka sanitaria agora dadaun ne’e. Maibe tanba audio iha problema entaun ne’e fo impaktu ba qualidade julgamentu tan parte sira la rona mos parte seluk koalia”, Diretora Ana Paula Marcal esplika.

Atu hadiak meiu video conference nian JSMP sujere antes julgamentu presija check kapasidade no velosidade internet no aparelu sira mak uza ba video conference nian.

Ba vitima sira mak nudar sasin, Diretora JSMP ne’e mos hato’o ba Neon Metin iha entrevista 17 Marsu 2021 katak fo sasin liu hosi video conference ne’e lei permiti.

“Tuir Artigu 243 Kodigu Prosesu Penal (KPP) kona-ba deklarasaun iha domisiliu, loke dalan atu vitima sira fo deklarasaun husi uma. Alendei KPP, Lei Protesaun ba Testemuna  ne’ebe promulga iha 2009 mos prevee klaru kona-ba ne’e. Artigu 4 no 5 kona-ba protesaun ba vitima vulneravel. Vitima bele fo sasin liuhusi telekonferensia, bele subar vitima nia lian no mos imajen bainhira sira hato’o depoimentu ka deklarasaun”, Diretora JSMP esplika.

Advogado Eis Padre Richard Dasbach, Miguel Acacio Faria hateten katak relasiona ho julgamentu ba kazu Topu Honis adia ba 5 Jullu, ho razaun tanba video conference ne’e la dun efetivu tanba ho rede ne’ebé kotu-kotu, nune’e mak defeza hato’o pedidu ba Tribunal, nune’e delibera no aseita atu julgamentu adia ba loron 5 Jullu no sei hala’o iha Oe-cusse

“Iha meius ida ne’e ohin tribunal foti desizaun katak arguidu tenki marka prezensa antes loron 5 advogadu no arguidu tenke iha ona Oe-cusse no kumpre regra serka Sanitaria no Konfinamentu Obrigatóriu tuir autoridade RAEOA nia desizaun ba regra COVID-19 nian. Ko’alia kona ba vítima ha’u lakohi fó komentáriu, tanba prosesu la’o hela, kona ba buat sira ne’e mak ema nia entendimentu la dun di’ak,” hatete Advogadu RD iha Tribunal Rekursu Dili, 10/06

Kazu Topu Honis mak nudar kazu pedofilia ne’ebe mosu ba publik dahuluk iha Timor- Leste no kazu ne’e involve eis-Padre Richard Dascbach hosi kongregasaun SVD nian. Ho rezultadu investigasaun Kongregasaun Dutrina ba Fe nian iha Vatikanu, Richard Daschbach konfesa tiha ona katak nia sala, no Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun tuir hela prosesu justisa ho kondenasaun kazu pedofilia, pornografia labarik no violensia domestika.

Print Friendly, PDF & Email

LEAVE A REPLY

Please enter your comment!
Please enter your name here