Home EduTek Relatoriu TLCE: Inundasaun 4 – 5 Abril 2021, Estraga Eskola 45

Relatoriu TLCE: Inundasaun 4 – 5 Abril 2021, Estraga Eskola 45

344
0
Koordenador TLCE, Jose Monteiro Aprezenta Rezulta Peskija Impaktu Inundasaun (Foto: Frans JDA)

Reportajen Santina Lucia da Costa

Relasiona ho Inundasaun no rai monu ne’ebé akontese iha fulan Abril 2021, ne’ebé afeta ba eskola sira iha Timor-Leste laran tomak, halo eskola 45 husi Munisipiu 7 mak afetadu, mak hanesan, Dili, Manatuto, Baucau, Aileu, Lospalos no Likisa, nune’e estraga eskola sira nia infrastrutura lakon mobilarius no materiais aprendizajen.

Tuir Diretor Ezekutivu, Timor-Leste Coalition for Education (TLCE), Jose Monteiro iha nia aprezentasaun relatoriu, hateten. Iha loron 4-5 abril 2021 akontese siklone seroja iha teritoriu Timor-Leste, munisipiu barak maka afetadu husi siklone seroja, ne’ebe rezulta estragus infrastruturas komunidade, instituisaun privadu no mos instituisaun publiku inklui mos eskola 45 mak afetadu husi inundasun no rai monu ka halai. Eskola hirak ne’e kompostu husi eskola privadu no eskola publiku husi ne’e maioria mak eskola publiku.

Diretor Ezekutivu, TLCE, Jose Monteiro, informa,  kategoria estragus nivel munisipiu sira mak hanesan, Dili, eskola hamutuk 30, no ida grave mak fasilidade hetan estragus mak hanesan sala de aula nakfera, livrus no manuais, kaderneta, meza no kadeira, moru eskola 3, ne’ebe bee tama tuir area portaun entrada nian hanesan EBF No. 2 Bebonuk, EBF Nu’u laran no eskola primaria publiku Hera.

Jose Monteiro, hatutan, Munisipiu Manatuto eskola 8 kategoria estragus ki’ik, mak hanesan, livru, manuais brinkeiru labarik sira nian mak hetan estragus iha TK MUKKY, enkuantu eskola sira iha Laleia no Laclo la hetan estragus maibe rai monu no fo ona ameasa ba eskola.

Munisipiu Baucau eskola 2 kategoria estragus 1 grave, mak eskola Ossohuna anin sobu desde 2017, iha reabilitasaun iha 2019. Iha abril 2021 anin boot sobu hotu fila-fali  no eskola Abafala rai monu no taka sala eskola. Munisipiu Aileu 2 kategoria estragus ki’ik, mak rai monu. Munisipiu Lospalos eskola 1 ne’e mos laiha estragus maibe presija hamoos de’it.

Munisipiu Likisa eskola 1 kategoria eskola ki’ik, mak farda desportu hamutuk 250, kadeira 12, meza 5 ba mestri nian no kadeiara 50 meza 50 ba estudantes nian. Munisipiu Ermera eskola 1, kategoria estragus natoon mak anin sobu eskola nia kakuluk iha aula 5.

“Mesmu ho situasaun hanesan ne’e  ita iha senariu optimista katak, ita la seguru husi dezastre naturais tanba ne’e mak se ita konsege iha kapasidade minimiza risku atu sai dezastre naturais, ita bele sai di’ak liu. Saida mak ita presija halo, ita estuda ba fatin ne’ebe ita hela ba, no eskola ne’ebe mak ita harii ba.” Hateten, Diretor Ezekutivu TLCE, Jose Monteiro iha aprezentasaun Relatoriu iha salaun CNE, Kaikoli, 2/7.

Jose Monteiro, dehan, Oinsa ita ba oin, primeiru normalizasaun no rekupera, prevensaun ita presija halo sosializasaun ka formasaun ba eskola hotu-hotu ba direjente eskola sira, estudante sira mos, para sira hatene, ita mos iha mekanizmu alerta  sedu bainhira fulan oin mai hetan ameasa ba inundasaun, anin boot, no rai monu.

Jose Monteiro, salienta katak, planu kontijensia, ita presija iha regra politika ne’ebé mak hatur, para depois define koordensaun oinsa, Ministeriu Edukasaun tenki koordena ho sé, bainhira mosu ona kalamidade nasional.

Iha fatin hanesan, Vise-Ministru  Edukasaun Juventude Desportu (MEJD), Antonio Guterres, hateten, Dadus husi sosiedade sivil ne’e, asaun konkreta maka, agora dadaun diresaun nasional asuntu escolar verifika hotu dadus sira ne’e iha tempu badak, eskola sira ne’ebe ita bele dehan apoiu emerjensia, eskola ne’ebe anin sobu, sei apoiu kalen, pregu, material sira.

“Haree husi dadus ne’ebe iha ami sei buka tempu tur hamutuk para integra didi’ak hamutuk fila-fali, tanba eskola sira ne’ebe hetan estragus ne’e balun prioridade ba tinan 2021 halo konstrusaun, balun eskola anin sobu, ita tenki halo planu di’ak, oinsa tinan 2022 bele halo di’ak,  no eskola balun uma kakuluk anin sobu ita halo imediata fo ajuda”, dehan, Antonio Guterres.

Print Friendly, PDF & Email

LEAVE A REPLY

Please enter your comment!
Please enter your name here