Reportazen Joselina dos Santos
Front Mahasiswa Timor-Leste (FMTL), husu governu atu fo subsidiu ba traballadores sira iha teritoriu Timor-Leste, tanba traballador mak sai fator determinante ba iha estabilidade ekonomia iha rai laran, no iha traballador mak iha sirkulasaun ekonomia la’o ho di’ak, no ekonomia povu bele estavel nafatin iha merkadu ekonomia.
Liu hosi konferensia imprensa Porta Voz FMTL, Epifania da Silva hateten haree ba situasaun sira ne’e, sira senti triste tebes ba intervensaun governu Timor-Leste, ne’ebe mak la estrateziku no lalais hodi kombate povu nia sofrimentu iha tinan hirak ne’e nia laran, maibe aumenta tan de’it nahan todan bo’ot ida iha povu nia kabas to’o agora, nune’e situasaun agora la’os de’it inserteza politika maibe inserteza moris povu nian ne’ebe nakonu ho perguntas tamba pratika politika obskurantismu.
Nune’e FMTL nafatin husu responsabilidade governu no politiku sira, tanba hahalok politika obskurantismu no kapasidade atu asegura nia povu husi risku hamlaha la define no klar, maibe asegura de’it mak interese grupu no partidaria, “mais pior defende egoismu politiku hodi abandona povu tomak sofre nunka tur hamutuk hodi fo liman ba malu”.
“Ne’e duni ami husu ba Governu Timor-Leste atu iha loron Mundial Traballador iha loron 01 Maiu 2021, foti desizaun politiku sira atu harmoniza fila fali, estabilidade ekonomia povu nian mak governu tenki halo desizaun imediata, hodi hapara rezolusaun estadu emerjensia no serka sanitaria no konfinamentu obrigatoriu. Husu mos SEPFOPE tenki hatun rezolusaun ida kona-ba selu traballadores sira ne’ebe mak empregador sira hapara iha situasaun COVID-19,” dehan porta voz, liu husi konferensia imprensa iha UNTL Kaikoli 01/05.
