Reportajen Santina Lucia da Costa
Ministeriu Edukasaun Juventude no Desportu (MEJD) liuhusi Sekretariu Estadu Juventude no Desportu (SEJD) Selebra Nota Memorandu Entendimentu (MoU) ho Ministériu Administrasaun Estatál (MAE) apoiu orsamentu $231.750.00, hodi realiza ba Jestaun no Organizasaun Programa Desportu Eskolár Ensinu Báziku no Sekundáriu.
Hafoin asina MoU Sekretariu Estadu Juventude no Desportu (SEJD), Abrão Saldanha Nokosiku hateten selebrasaun akordu entre orgániku iha domíniu area juventude hamutuk ho MAE, delega kompeténsia iha serbisu Desportu nian, balun ba Administrasaun Munisipal, iha kompetensia rasik organiza atividade iha Munisipiu sira.
“Iha dominiu juventude nian por ezemplu joven iha suku estimula empreendedorizmu suku, arte marsiais nian, iha desportu nian maka, desportu eskolar iha ensino baziku no sekundariu, desportu komunitaria no festival desportu munisipais tradisionais ne’ebé promove fali ho fasilidade desportu sira, nivel komunitariu hanesan kompetensia ne’ebe serbisu munisipal sira.” hateten Abrão Saldanha Nokosiku iha salaun enkontru MAE, Kolmera, 18/11/2021.
Iha fatin hanesan Ministru Administrasaun Estatal (MAE), Miguel Pereira de Carvalho afirma, tuir dekretu lei nu.3/2016 ne’ebe maka kompetensias lubun ida ba area dominiu desportu so bele realizadu wainhira ihanonaakordu delegasaun kompetensia.
“Hau kontenti teb-tebes tanba tinan 5 nia laran, iha VIII Governu Konstitusionál, governamental na’in rua ne’e konsege asina akordu entre organiku ida ne’ebe maka deskonsentra kompetensia husi governu sentral nian husi SEJD nian ba Administrasaun Munisipal no Autoridade Munisipal sira para atu bele realiza desportu eskolares, desportu komunitaria, atividade juventude sira tantu iha Postu-administrativu no iha suku sira.” Dehan Miguel Pereira de Carvalho.
Nia hatutan ho asinatura akordu ida ne’e, sei iha juventudes desportu barak liu para envolve juventude no populasaun barak liu tan iha nivel suku no aldeia, ne’e papel governu sentral nian atu garante melhoria serbisu publikus iha ita nia populasaun sira iha Munisipiu, area rurais, ida ne’e ita bele realiza respeita obrigasaun konstituisional nian.
