Home Analisa Oin-nusa Prosesu Konaba Petisaun Inisial Tuir Kódigu ba Prosesu Sivil Timor-Leste?

Oin-nusa Prosesu Konaba Petisaun Inisial Tuir Kódigu ba Prosesu Sivil Timor-Leste?

559
0
Tiago Amaral Sarmento Ex-Assessor Jurídiku no Koordenador ba Asuntu Jurídiku ho Konstitusionais PR-RDTL. [Foto: Dokumentu Privadu | 17.01.2021]

Elabora husi Tiago Amaral Sarmento

Artigu ida ne’e hakerek bazeia ba Kódigu Prosesu Sivil (KPS), atu esplika prosesu Petisaun Inisial (PI) nia klala’ok nebé baibain hala’o iha Tribunál sira Primeira-Instánsia, inklui oin-nusa Petisaun ida priense duni rekezitus tuir KPS.

Molok parte sira ’’Autor ho Reu’’(Penggugat dan Tergugat), hakarak halo asaun sivil lori malu ba Tribunál, tamba la iha ka la hetan konsensu ruma ba sira nia problema (materia ba kazu sivil liga liu ho asuntu sira hanesan; kontratu ka akordu, divórsiu, fa’an ka sosa sasan ruma, disputa rai, nst), uluk knana’in parte sira sei halo esforsu ho meius ’mediasaun’. Baibain, iha faze mediasaun, parte sira bele ba buka instituisaun sira nebé sai hanesan mediador, ka buka ema ruma nebé mediador atu buka uluk solusaun fora husi Tribunál, ka liu husi sira nia advogadu parte sira nian hodi buka solusaun.

Kazu sivil, ninia finalidade la’os atu hatama ema ruma ba kadeia ka prizaun, maibe kazu sivil ninia finalidade mak ema fo sala malu, selu osan ruma ka imdemnizasaun, nst.

Bainhira sei iha faze mediasaun, parte sira hetan solusaun karik, sira sei la lori sira nia problema ba Tribunál maibe hakotu de’it entre sira. Maibe, karik mak parte sira la hetan solusaun iha faze mediasaun, ka la iha solusaun, ka parte ruma la satisfaz ho solusaun husi mediasaun, nune’e dalan ba Tribunál nu’udar meius legal ida nebé sira tenki liu. Tamba tuir Lei, desijaun Tribunál ne’e kesi metin ema hotu (iha forsa vinkulativu) atu kumpri de’it no sei la iha tan objesaun ka la iha tan dalan seluk.

1. PETISAUN INISIAL (PI)

Iha faze mediasaun mak, parte sira la hetan solusaun ho damen (entre parte sira), sira nia advogadu ka liu-liu parte ida nebé la simu solusaun ne’e ninia Advogadu mak sei elabora no prepara PETISAUN hato’o kliente nia konflitu ne’e ba Tribunál liu husi PI.

Bazeia ba artigu 349 husi Kódigu ba Prosesu Sivil (KPS), PI nebé atu hatama ba Tribunál tenki fo atensaun ba rekezitus sira hanesan tuir mai;

a. Tenki hatudu Tribunál ida nebé mak iha kompeténsia jurisdisionál atu simu asaun ne’e, inklui identifika parte sira nia naran/identidade, servisu ka lae, servisu karik servisu iha nebé, la servisu karik ema ne’e halo sa ida/knar, nomos hela fatin;

b. Hatudu parte rua ho sira nia Advogadu nia domisíliu profisionál ka eskritóriu (Advogadu ne’e tenki fo hatene sira nia domisíliu profisional, nomos parte sira tenki halo prokurasaun ba advogadu atu reprezenta sira iha asaun ne’e) iha fatin nebé iha sede Tribunál, atu simu notifikasaun. Sira la fó hatene karik, sira sei simu notifikasaun iha loron ikus liu,hafoin Tribunál fo sai nia desijaun,

Bazeia ba artigu 212 husi KPS, Advogadu ka mandatáriu judisiál bele simu notifikasaun iha sira nia eskritóriu nomós bele simu notifikasaun wainhira funsionáriu judisiál hasoru sira iha edifísiu Tribunál.

Tuir mai, iha artigu 36 husi KPS mos regula katak, iha kazu nebé bele admite rekursu no iha kazu nebé hato’o kedas ba Supremu Tribunál ba Justisa (STJ), tenki konstitui Advogadu. Maibe iha kazu sira nebé iha ona reprezentante hosi Ministériu Públiku ka Defensor Públiku, la konstitui Advogadu.

Bainhira lei dehan katak obrigatóriu nomeia Advogadu, maibe parte sira la halo tuir, Tribunál sei fo prazu atu sira bele konstitui sira nia advogadu, lae karik, Reu (tergugat) hetan absolvisaun hosi instánsia, rekursu la bele ba oin ka defeza la iha efeitu (artigu 37 husi KPS).

Konaba oin-nusa atu fo mandatu ba Advogadu sira husi kliente ka parte sira nebé fo poder ba mandatariu ka Advogadu atu reprezenta iha aktu no termu hotu-hotu iha asaun prinsipal nomos ninia insidente sira, hahu husi Tribunál Primeira-Instánsia to’o STJ, tenki iha poder espesial husi mandate (ema nebé fo mandatu), sei inklui mos poder atu substabelese mandatu ka substitusi (art. 39 husi KPS). Substitusi nebé la iha rezerva, esplika katak mandatariu ida uluk lae ona. Mandatu efikasia wainhira iha aseitasaun iha dokumentu públiku ka partikular ka hare hodi mandatariu nia hahalok.

2. PROSESU NIA FORMA

KPS Timor-Leste, hatúr FORMA OIN RUA (art. 347 KPS) konaba kestaun PI;

a. Prosesu Komum, Prosesu Komum regula iha títulu II, kapítulu I ho II husi KPS.

b. Prosesu Espesial, Prosesu espesial regula iha títulu VI husi KPS.

a)Prosesu komúm sei uza iha situasaun ne’ebé lei la haruka tuir prosesu espesiál (n. 2 husi art. 347 KPS).

b)Artigu 790 husi KPS hateten katak konaba material sivil iha prosesu espesial mak hanesan; interdisaun no abilitasaun, reforma ba autu, dokumentu no livru, prestasaun ba kausaun, Divorsiu no separasaun ema no sasan, prestasaun alimentus, revizaun ba sentensa estranjeira, inventáriu, asaun ba indemnizasaun kontra Majistradus, prosesu seluk nebé lei sei konsagra.

Tamba ne’e, material sivil hirak nebé la inklui iha artigu ida ne’e sei la’o tuir regra prosesu komum ba deklarasaun nian.

* Petisaun inisiál nia rekizitu (art. 349 husi KPS)

Iha petisaun, ne’ebé uza hodi hatama aksaun iha tribunál, autór tenke:

a) Hatudu tribunál iha ne’ebé nia hatama aksaun, identifika parte sira, ho sira nia naran, domisíliu ka sede no, bele karik, profisaun no servisu-fatin;

b) Hatudu nia mandatáriu judisiál nia domisíliu profisionál;

c) Hatudu prosesu nia forma;

d) Espoin faktu no direitu ne’ebé fundamenta aksaun ne’e;

e) Formula pedidu;

f) Deklara aksaun nia valór.

Iha petisaun nia finál autór bele aprezenta kedas testemuña, iha lista, no rekér prova seluk tan.

Sei kontinua——

*(Ex-Assessor Jurídiku no Koordenador ba Asuntu Jurídiku ho Konstitusionais PR-RDTL, Ex-Sekretariu Jeral Asosiasaun Advogadu Timor-Leste).

Print Friendly, PDF & Email

LEAVE A REPLY

Please enter your comment!
Please enter your name here