Programa Ai-han Mundial (WFP/PAM), iha kolaborasaun ho Ministeriu Solidariedade Sosial no Inkluzaun (MSSI), Ministeriu Saude (MOH), no Autoridade Munisipiu Manatuto, ohin lansa distribuisaun Ai-han Nutrisaun Espesializadu (SNF) ba inan isin rua, inan fo susu no labarik sira ne’ebé vulneravel ho idade tinan tolu mai kraik.
Tuir komunikadu imprensa ne’ebe Neon Metin ases informa katak, lansamentu ne’e hala’o iha Postu Administrativu Soibada, hamutuk ho lider governu sira, autoridade lokál sira, Gabinete Kooperasaun Fransa, no WFP/PAM sira atu ofisialmente hahú distribui ai-han ne’ebé fortifikadu hodi hadi’a nutrisaun inan no oan iha Timor-Leste. Inisiativa ne’e sei hahú iha Manatuto no sei habelar ba Aileu, Ainaro no Baucau, hodi benefisia inan no labarik ki’ik besik na’in 8.500 liu husi fornese Supercereal tonelada metrika 153, inklui Super Cereal no Super Cereal plus – hahán fortifikadu no kahur hodi responde ba sira-nia nesesidade nutrisaun.
Timor-Leste kontinua hasoru númeru malnutrisaun ne’ebé aas entre labarik sira ne’ebé seidauk to’o tinan tolu no feto sira ne’ebé ho idade reprodutiva. Liu husi esforsu konjunta ida-ne’e, WFP/PAM no Governu Timor-Leste servisu daudaun hodi hametin sistema protesaun sosiál no saúde hodi asegura katak família vulneravel sira simu nutrisaun ne’ebé sira presiza. Maske rekursu sira nafatin limitadu no kobertura iha nasaun laran seidauk posivel, parseiru sira afirma sira-nia kompromisu atu hamenus no prevene malnutrisaun iha nasaun laran tomak.
“Lansamentu ida-ne’e reflete kapasidade parseria nian,” dehan reprezentante Nasional WFP “Hamutuk ho MSSI, MOH, no apoiu husi Governu Fransa, ami foti ona pasu importante ida atu hadi’a nutrisaun ba inan no labarik sira iha Timor-Leste. Maski dezafiu sira sei mosu nafatin, maibé ita-nia kompromisu atu hapara malnutrisaun la iha tan.”
Ministru Solidariedade Sosial no Inkluzaun hateten importánsia husi esforsu koordenadu sira: “Liuhusi inisiativa ida-ne’e, ita hametin protesaun sosiál no asegura katak família vulneravel sira simu apoiu ne’ebé sira presiza ba futuru ida-ne’ebé saudavel.”
Distribuisaun ne’e hetan liuhusi apoiu jenerozu husi Governu Fransa, ne’ebé finansia aprovizionamentu ba ai-han nutritivu espesializadu sira.