Reportajen Silvino Freitas
Dosente Joviano Antonio da Costa husi Fakuldade Enginaria Ciencia no Teknoljia (FECT) eleitu sai reitor ba Universidade Nasional Timor-Lorosa’e (UNTL) ba periodo 2026-2031 substitui reitor atual Joao Martins, nune’e bainhira simu ona tomada posse, nia sei kontinua susesu neebe reitor atual halo, no sei hadia naksalak neebe iha no sei lori nia kbiit no responsabiliza tomak servi UNTL.
Reitor eleitu Joviano Antonio da Costa dehan, sei esforsu ho kbiit tomak ba konfiansa ne’ebe atribui ba nia hanesan reitor foun ba UNTL sei lori diak ho responsabilidade atu momentu ida maluk sira labele dehan garganta deit maibe sei tau responsabilidade ne’e tuir nia kbiit no forsa tomak, nunee nia agradese ba konsellu jeral no reprezentante husi emprejariu governu no estudante ne’ebe atribui konfiansa ba nia.
“Hau sei esforsu tomak hili ema ne’ebe diak iha UNTL atu servisu ho hau hodi lori UNTL ba oin” dehan reitor eleitu Joviano Antonio hafoin eleitu iha salaun auditorium FECT Hera, (12/12).
Nia dehan tan, prosesu laos nia mesak no sai reitor ne’e laos hanesan dekanu maibé nia hamriik hanesan reitor lori mos nia fakuldade Enginaria nune’e ho esforsu tomak husi dekanu fakuldade mak lori nia sai eleitu ba reitor tanba sira nia estrutura husi dakanu dosente too estudante mak lori nia sai reitor, bainhira simu ona tomada posse sei laos hanesan nain ba Enginaria maibé sei sai nain ba UNTL tomak ne’ebe kompostu husi fakuldade 10.
“Hau mos hakarak agradese ba ami nain 12 ne’ebe konkore hahu orseik too ohin ne’ebe aprezenta ba konsellu jeral atu bele fo konfiansa ba ida entre 12” dehan Joviano.
Nia konklui, susesu tomak neebe reitor atual halo durante tinan 5 sei kontinua bainhira simu ona posse nune’e mos buat balun ne’ebe naksalak ne’e nia obrigasaun atu hadia , nune’e nia agradese ba primeiru reitor ho estrutura tomak neebe iha tinan 25 nia laran esforsu tomak lori UNTL sai instituisaun estatal ne’ebe diak iha Timor-Leste.
Kandidatu ba reitor foun UNTL hamutuk nain 12 ne’ebe eleje husi ema nain 17 konsellu jeral UNTL reprezentante husi konsellu ministru, ministru ensinu superior, ministru finansa, emprejariu nasional no reprezentante estudantil, nune’e reitor foun Joviano Antonio da Costa eleitu ho votu 9 iha segundu volta ne’ebe kompete ho Cristovao dos Reis ho votu 6 no Samuel Venancio ho votu 2, nune’e Joviano Antonio da Costa eleitu ba reitor UNTL periodo 2026-2031 substitui reitor atual Joao Martins ne’ebe lidera periodo 2020-2025.
