Reportazen Zevonia Vieira
Tuir relatoriu ne’ebe Neon Metin asesu hatudu katak iha tinan 2021 moras respiratoriu (moras dada iis araska) sae makaas, ho situasaun ida ne’e ba numeru konfirmadu COVID-19 ne’ebe kontinua sae.
Liu hosi zoom konferensia imprensa, Neon Metin halo konfirmasaun konaba moras respiratoriu ne’ebe sae makaas, karik entre moras ne’e balun mos detekta kazu konfirmadu COVID-19, ba Neon Metin Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo hatan katak durante ne’e Ministeriu Saude halo analize ba infeksaun respiratoria, iha vijialansia sintenela ne’ebe iha, durante tinan kotuk no fulan hirak nia laran, iha amostra ne’ebe foti 3000 mill resin iha rezultadu negative, hosi Janeiru mai oin mos hanesan hafoin kazu sira aumenta makaas hahu hosi Fevereiru to’o ohin loron, ne’e mak hatudu sintomatiku balun relasiona ho infeksaun respiratoriu.
‘Vizilansia sintinela ne’ebe halo monitoriza sintomas respiratorius tanba ne’e mak halo teste sira ne’e”, dehan Dr. Rui iha zoom konferensia imprensa, 16/03.
Dr. Rui konklui katak populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek. Maski kazu konfirmadu aumenta ba beibeik, no naklekar mós ona ba Munisipiu Baucau & Viqueque, husu atu tu’ur nafatin hakmatek, atu nafatin matanmoris neon nain, lalika sé tilun ba lia-anin ka rumores, pratíka nafatin medida sira 4 ne’ebé ita hotu hatene ona katak uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, la presiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.
