Reportajen Adroaldo “Saretukau”
Abrão Pinto de Almeida, staff Kréditu Moris Rasik hetan taa hosi ema deskoñesidu, iha nia parte ulun no kotuk hodi hadau osan Kréditu Moris Rasik nian $500 resin, wainhira nia halo kobransa ba kliente sira iha Same, Ferik Sare wainhira nia atu fila ba office Moris Rasik iha Postu Fatuberlihu, munisípiu Manufahi, horseik, segunda-feira meiu-dia (11/04).
Ba Neon Metin via telefone, Abrão dehan wainhira nia atu fila hosi Same, Ferik Sare, ema deskoñesidu taa nia hodi hadau osan iha pasta no halai tiha. Ohin (12/04) nia halo keixa ona iha eskuadra Polísia Same hodi hein prosesu tuir mai.
“Nia hein no satan ha’u hodi hadau osan. Ema ha’u la koñese, modelu ninza ne’e, nia hadau osan $500 resin hodi halai tiha. Ha’u ba servisu iha Seli-Hasan (Same) atu fila fali ba Fatuberlihu (fila ba office Moris Rasik iha Fatuberlihu),” informa Abrão ba Neon Metin ohin dadeer, 12/04.
Nia hatutan oras ne’e sira sei hato’o keixa iha Polísia no fila mai Díli hodi halo kurativu iha ospital, hafoin ne’e sei rezolve hamutuk osan ne’ebé kréditu Moris Rasik ne’ebé ema hadau ne’e.
