Home Saude MS Ho Asosiasaun HAMNASA Asina Memorandu Hodi Kombate Moras TB no HIV/AIDS...

MS Ho Asosiasaun HAMNASA Asina Memorandu Hodi Kombate Moras TB no HIV/AIDS Iha TL

156
0
MS Ho Asosiasaun HAMNASA Asina Memorandu. [Foto: Joselina | 14.06.2022]

Reportajen estudante estajiadu UNTL, Joselina dos Santos

Ministériu Saúde (MS), servisu hamutuk ho Asosiasaun HAMNASA realiza serimónia ba asinatura  Memorandum Entendimentu entre Ministériu Saúde no Asosiasaun HAMNASA, objetivu sai nu’udar Memorandum Entendimentu ba dala uluk entre parte rua, hodi kombate moras sira hanesan Malaria, TB no HIV / AIDS iha Timor-Leste.

Iha diskursu ne’e, Vise Ministru Saúde Bonifácio Mau Coli dos Reis hato’o parabens ba Asosiasaun HAMNASA no estrutura tomak, tanba ho sira nia disponibilidade tomak atu apoia Ministériu Saúde.

“Iha oportunidade ne’e, hakarak atu espresa ami nia sentidu no profundu gratidaun ba apoiu no kooperasaun kontínua ne’ebé fornese husi Fundo Global ba Timor-Leste liu husi Mekanismu Koordenasaun ba Nasaun- Timor-Leste (CCM-TL)”, hatete, Vise Ministru Saude Bonifácio Mau Coli dos Reis, iha nia diskursu iha Palacio dos Cinzas Caicoli, 13/06.

Governante ne’e dehan, Fundo Global nia apoiu nu’udar sentidu solidariedade atu haforsa, hametin no mellora sira-nia Sistema Nasional Saúde ho objetivu atu hadi’ak komunidade Timor-Leste nia saúde no moris di’ak iha nivel Nasional, Munisipal, Postu Administrativu, Suco no Aldeia ikus liu maka Komunidade no família ida idak, partikularmente atu kombate moras kontajioza tolu maka hanesan Malaria, TB no HIV / AIDS.

“Ministériu Saúde tau iha konsiderasaun no rekoñee katak kolaborasaun no kooperasaun mútua ho parseiru dezenvolvimentu,  parte interesadu/ stakeholders, ajénsia nasoens unidas, ajénsia doadór sira maka pertinente tebes atu alkansa vizaun, misaun no meta ne’ebé define tiha ona iha Planu Estratéjīku Dezenvolvimentu Nasionál Setór Saúde tinan 2011- 2030. Parseiru ida-ne’ebé ohin ita atu realiza kooperasaun maka Asosiasaun HAMNASA”, nia relata.

Nia dehan Planu Estratéjiku Nasionál Setór Saúde haktuir ona motto, “Populasaun Timor-Leste Saudavel iha Timor Leste ida ne’ebé Saudavel” nune’e mós Programa VIIl Governu Konstitusionál iha kompromisu atu mellora prestasaun no asisténsia kuidadu saúde, ba iha territóriu laran tomak, ho espesiál atensaun ba áreas remotas no kamada  populasaun ne’ebe desfavoresidu, tuir prinsípiu inkluzaun, ekuidade, efisiénsia no kualidade ba  ema hotu hotu. Atu bele iha ekuidade tenke iha ekilíbriu ba infra-estrutura, rekursu  finanseiru, medikamentu no ekipamentu médiku no naun médiku ne’ebé presiza atu bele providénsia asisténsia saúde ho dignu, profisionál no tuir padraun ne’ebé iha ba ita nia komunidade.

Print Friendly, PDF & Email

LEAVE A REPLY

Please enter your comment!
Please enter your name here