Reportajen Santina Lucia da Costa
Primeiru Ministru (PM), Taur Matan Ruak hasoru malu ho Prezidente Republika, Dr. Francisco Guterres Lú Olo, hodi koalia kona-ba presu sasán ne’ebe sae, nune’e Xefe Governu hanoin presiza tau importánsia no tau matan ba produtu lokál.
Liuhusi enkontru ne’e Taur Matan Ruak informa ba jornalista sira, hafoin hasoru malu ho Prezidente Lu Olo, Taur dehan Prezidente Preokupa ho folin sasán ne’ebe sae, no presiza tau prioridade ba produtu lokal, no asuntu seluk mak preparativu ba seremona tomada de posse ba Prezidente Republika ne’ebe eleitu
Primeiru Ministru husu ba ema hotu-hotu, tenké fó importánsia no tau matan ba produtu lokál, sé hein de’it sasán importa mai husi liur, no ita la preokupa iha rai laran ba futuru ita mate hamlaha.
“Ita tenke preparadu loos prinsipiu ida ke ha’u hanoin ita hotu tenke fó fali importánsia mak tau matan ba ita nia produtu lokál, se ita hein de’it buat ne’ebé mai husi liur, ita la preokupa ho buat ne’ebé rai laran dala ruma aban bainrua ita mate hamlaha. Entaun ita fila fali ba ita nia aifarina, hudi, talas, batar ita tenke komesa halo han fali ida ne’e.” Dehan, Xefe Governu.
Daudaun ne’e, Governu iha medidas lubuk ida ne’ebé avansa, liuhusi orsamentu ratifikativu tinan 2022 ho montante $ 1,129 Biliaun, no naturalmente oras ne’e sei diskute iha Parlamentu Nasionál tanba horsehik entrega tiha ona ba Parlamentu Nasionál.
Taur realsa tan katak hanesan ita boot sira hatene ita daudauk ne’e nesesidade barak loos, nesesidade ida mak halo nusa mak ita komesa sustenta ita nia aumenta presu sira ne’e, se ita la tau matan ida ne’e ita boot sira haree mikrolet sira komesa halo greve entaun ita tenke lalais antes agrava.
Entretantu kona-ba serimonia tomada posse ba Prezidente Republika eleitu, Primeriu Ministru haruka ona karta konvite ba nia omologu sira liuliu Xefe Governu iha nasaun seluk, maibé karta konvite ne’e tarde tanba preokupa ho Eleisaun Prezidensial.
“Tomada de posse ne’e ha’u la lembra lista, maibé ha’u haruka ona balun ita haree took sé mak sei mai ne’ebé ita lalika espekula dehan, normalmente konvite sira tenke sai antes, ita nia sai tarde loos tanba ita mós iha eleisaun entaun ita nia lista sai tarde loos, ida ne’ebé mai ita sei simu atu partilla alegria ne’e ho nia nasaun ho ita nia populasaun sira iha tomada de posse ne’e.” Hateten, Taur Matan Ruak.
