Home Notisia Oxfam Lansa Avaliasaun Agrikultura, Fernando: Situasaun Covid-19, Investe Liutan Iha Agrikultura

Oxfam Lansa Avaliasaun Agrikultura, Fernando: Situasaun Covid-19, Investe Liutan Iha Agrikultura

231
0
Oxfam iha Timor-Leste halo konferensia imprensa. [Foto: Petir Liar | 01.04.2020]

Reportazen Zevonia Vieira

Oxfam Timor-Leste lansa relatoriu konaba avaliasaun ba setor agrikultura nian iha Timor-Leste. Peskiza ne’ebe Oxfam mak halo hetan katak dezafiu sira ne’ebe mak agrikultor sira hasoru hanesan asesu ba merkadu hodi faan sira nia produtu, materiais servisu la sufisiente no difikuldade asesu ba bee irigasaun. Investe iha area hirak ne’e sei haburas liutan servisu agrikultura no bele kontribui ba hamenus kiak.

Impaktu ne’ebe agrikultor sira hasoru hetan problema boot liu bainhira virus Corona ne’ebe daet to’o mai Timor no dezastre naturais ne’ebe akontese, Oxfam nia Jestor Senior ba Programa Parseria no Influensia nian, Fernando da Costa hateten, situasaun COVID-19 ho dezastre naturais mak akontese foin dadaun, hatudu momoos katak iha duni importansia bo’ot atu diversifika Timor-Leste nia ekonomia, liu hosi dezenvolve ho diak setor responde, antes husu tulun hosi nasaun seluk.

“Situasaun impasse politika, dezastre naturais mak akontese dadaun no COVID-19 fo efeitu bo’ot ba ema hotu nia moris. Iha situasaun hanesan ne’e agrikultor sira, feto no ema ho defisiensia mak hetan efeitu liu. Relatoriu peskija hatudu katak maski feto nia partisipasuan iha atividade agrikola aas maibe sira la iha desizaun ba rendementu mak hetan, feto sira produs uituan liu, sira ladun hetan apoio materiais, no sira hasoru risku bainhira atu faan sira nia produtu iha merkadu tanba asesibilidade ba merkadu no seguransa,” Oxfam nia Jestor Senior ba Programa Parseria no Influensia nian, Fernando da Costa hateten, 01/04

Relatoriu Avaliasaun Agrikola Oxfam nian nota katak dezenvolvimentu ekonomia mak lao dadaun, seidauk fo atensaun bo’ot ba partisipasaun feto no ema ho defisiensia iha dezenvolvimentu agrikultura. Feto sira iha munisipiu, no feto no mane ho defisiénsia kiak liu kompara ho sira-nia vizinu ne’ebé la moris ho defisiénsia. Relatoriu ne’e mos hetan katak susar atu asesu ba merkadu hodi faan sira nia produtu, materiais servisu la sufisiente no difikuldade asesu ba bee irigasaun mak sai nudar dezafiu ba agrikultor sira.

Iha relatoriu peskiza Oxfam nian mensiona katak Grup Feto Ortikultura ida iha Viqueque hateten katak sira kuda barak maibe difisil ba sira atu hetan osan hosi sira nia produtu.

“Ami kuda barak maibé difisil ba ami atu hetan osan husi ami nia produtu ne’e; ami laiha asesu ba merkadu tanba kondisaun estrada ne’ebé aat no laiha trasporte publiku iha suku ida-ne’e. Iha suku ne’e rasik mós laiha merkadu ruma inklui lokal. Ami dook husi Viqueque, nune’e aminia modo sira ne’e ba konsumu iha uma laran de’it, balun ami han no balun ami fó han fahi,” Lider Grupo Feto Ortikultura ida iha Viqueque expresa iha relatoriu laran.

Iha rezultadu peskiza Oxfam halo entrevista mosh o Grupu Ortikultura ida hosi Oecusee. Lider grupu Ortikultura ida Oecusee hateten bainhira sira kolleta, sira faan deit ba iha komunidade sira.

“Bainhira ami kolleta, ami faan besik de’it ba iha komunidade sira. Ami triste loos tanba ami produs modo organiku maibe laiha konsumidor. Ami presiza ema ida atu liga ami ho konsumidor sira, maibé nunka akontese.”

Liu hosi konferensia imprensa Fernando da Costa mos hateten, iha hanoin hanesan hosi ofisial Ministeiru Agrikultura e Pescas katak agrikultor sira iha produsaun no kuandu iha demanda husi merkadu, klaru katak sira sei iha inisiativa hodi hasae kualidade no kuantidade produsaun. Maibé iha realidade laiha merkadu, oinsa atu husu agrikultor sira hodi hasae sira-nia produsaun? Sira so bele lori produtu ne’e ba iha merkadu local, Oinsa ita bele aporxima joven sira atu envolve iha agrikultura, bainhira sira labele halo osan tanba laiha merkadu.”

Hosi relatoriu ne’e Oxfam rekomenda atu governu muda nia foku investimentu husi konstrusaun estrada prinsipal sira, ba hadi’ak dalan no estrada ne’ebé liga agrikultor ba merkadu. konsidera inisiativa ne’ebé sei hasae disponibilidade transporte publiku ba agrikultor-vendedor sira ne’ebé buka atu faan sira-nia produtu iha merkadu. Hasa’e fornesimentu bee ba irigasaun nian, liuliu esplora potensia sistema irigasaun ne’ebé ladepende ba bee iha rai leten, maibé esplora bee iha rai okos; promove operasaun no manutensaun ba sistema irigasaun ne’ebé iha ona. 

Oxfam fiar katak bainhira iha dezenvolvimentu agrikultura ida inklusivu bele lori kresimentu ekonomia ne’ebé inkluzivu no fó impaktu direta ba redusaun pobreza iha nasaun ne’e. Dezenpeñu di’ak husi setór agrikultura nian mós bele lori seguransa ai-han no nutrisaun di’ak iha nasaun ne’e. Iha Timor-Leste populasaun 24.9% mak hetan mal-nutrisaun, labarik 48.6%, taxa ida ne’e internasionalmente aas.

Liu hosi Oxfam nia programa Hadalan Lian ba Governasaun Diak, sei lori hamutuk lian inklusivu no lian oioin atu bele tau matan no influensia pulitika publik, liliu ba asuntu sira mak relasiona ho dezenvolvimentu agrikultura no ekonomia. Programa ne’e sei implementa iha tinan rua nia laran ho suporta fundu hosi Governu Australia liu hosi Governance for Development [GfD] program.

LEAVE A REPLY

Please enter your comment!
Please enter your name here