Reportajen Silvino Freitas
Sosiedade-Sivil liuhusi Forum Organizasaun Naun Governamental Timor Leste (FONGTIL) realiza enkontru jerál anual hodi aprejenta relatóriu anuál no diskuti servisu advokásia ba promove boagovernasaun, akuntabilidade no transparante ba prosesu konstrusaun estadu.
Diretór FONGTIL Valentim da Costa Pinto dehan, husi enkontru anual ne’e mak sei aprezenta relatóriu anual hodi hetan ratifikasaun husi membru sira nune’e mós fahe informasaun sira ne’ebé relevante ho sira nia topiku ba tinan ida ne’e, hodi haforsa sosiedade-sivil nia nia advokásia ba servisu públiku sira ne’ebé sei promove boagovernasaun, akuntabilidade no transparante.
“Ami sosiedade-sivil FONGTIL ho nia membro sira ne’ebé sai parseiru estratejiku ba prosesu konstrusaun estadu no konsulidasaun prosesu demokrasia iha ita nian rain, tanba ne’e ami tenke komunga didi’ak ami nia kna’ar sira atu bele kontinua mantein parseiru estratejiku ba ita nia estadu” dehan Diretór FONGTIL ba jornalista sira iha ambitu enkontru anual iha salaun Canossa Has-Laran, (15/11).
Valentim fundamenta, iha tinan fiskal 2024 FONGTIL hetan apoiu fundus husi GASC ho montante $110.000, nune’e osan sira ne’e kabe ba apoiu mandatu importante 4 iha kada tinan 5 maka dizemina informasaun, haforsa koordenasaun ho entidade hotu hotu, servisu advokásia no empoderamentu.
“Ita boot sira haree iha baner 4 ne’ebé iha ne’e ami sita sumariu 4 ba mandatu sira ne’ebé ami lao ho osan ne’ebé ami hetan apoiu husi gabinete apoiu sosiedade-sivil” dehan Diretór FONGTIL.
Diretór ne’e konklui katak, husi atividade enkontru jerál anual ne’e sira hetan mós apoiu fundus husi Uniaun Europeia ba sira nia atividade ne’e ho montante liu $3000 hodi finansia ba sira nia eventu, maskí ba dadaun ne’e Uniaun European ho FONGTIL seida’uk iha kooperasaun ofisial ba servisu hamutuk nian.
