Reportajen Umbelina dos Reis
Diretor Ezekutivu Centro Nasional Chega (CNC) I.P. Hugo Maria Fernandes informa profesores sira tenki tuir formasaun kuaze 8000 i tal, maibé agora profesores sira ne’ebé tuir formasaun ona konaba matéria edukasaun sidadania, istória no direitus umanus foin 400 liu, nune’e faze sei naruk hodi bele asegura profesores sira mak tenki hatene uluk konaba istória Timor nian, hafoin hanorin estudante sira, tanba profesores balun jerasaun tuan no balun jerasaun foinsa’e.
“Avaliasaun foin lalais ne’e ita nota katak profesores balun jerasaun tuan, nune’e bainhira sira hanorin iha tendénsia hodi konta rasik sira nia istória ba estudante sira, maibé profesores balun ne’e jerasaun foinsa’e, nune’e dezafiu hirak ne’e presiza hadi’a.” Nia dehan.
Profesores sira agora ne’e hanorin estudante sira konaba materia istória ne’e depende ba sira nia kapasidade de’it, maibé livru istória Timor nian seidauk barak, mezmu ita produz livru istória lubuk ona maibé limitadu tebe-tebes tanba eskola iha Timor-leste ne’e barak, biblioteka sei menus, Nia esklarese.
