Reportajen Joselina dos Santos
PNTL sei garante katak kampaña loron rua ikus sei la’o ho diak, maibe presiza kooperasaun kontribuisaun husi militante, apoiante, simpatizante, no ekipa susesu kandidatura sira tenke kumpre regra normas no prosedimentu ne’ebe mak CNE-STAE fó sai ona.
“Antes ida ne’e tenke iha kampaña dame paz unidade iha teritóriu Timor laran, ne’ebe mak hala’o ona iha nivel nasionál to’o iha nivel munisipál ida ne’e sai hanesan travesaun ida nu’udar timor oan hakru’uk no respeitu,” dehan Porta Vóz Komandu Jéral PNTL, Superintendente Xefe Polísia Armando Monteiro ba Jornalista sira iha Salaun PNTL Kaicoli, 14/03.
Liuhusi konferensia imprensa, Porta Vóz Komandu Jerál PNTL, Superintendente Xefe Polísia Armando Monteiro hatete, Kazu asaltu Ofensa Integridade fizika simples no agravadu ne’ebe mak rezulta sidadaun nain ida Mate ida kanek grave no nain rua seluk hetan kanek kman Hafoin remata kampaña iha Baucau.
“Sidadaun LR ne’ebe kanek grave ne’e, evakua ona husi Hospital Referal Baucau mai iha Asistensia Saúde Hospital Nasionál Guido Valadares (HNGV), no nain rua seluk hetan mos kanek kman iha área Samalari hafoin remata ou partisipa kampaña iha Darasula Suku Gari-Way, Postu-Administrativu Baucau Vila, Munisipiu Baucau,” tenik nia.
Nia hatutan, Kazu iha Baucau akontese iha dia 12 fulan marsu 2022 maiz ou menus tuku 02.00h TL, Komandu PNTL munisipiu Baucau dadaun ne’e halo ona identifikasaun no deskonfia ema nain tolu ne’ebe mak involve iha kazu ofensa integridade agravadu ne’e, tanba ne’e husu atu akompaña nafatin motivu husi akontesimentu ne’e.
“Liu husi oportunidade ida ne’e, Komandu Jéral Polísia Nasionál Timor-Leste (PNTL), apela nafatin no husu kontribuisaun ba apoiantes militantes no simpatizante husi Kandidatura Prezidente na’in 16, no mos orgão das eleições CNE ho STAE atu kolabora hamutuk ho Polísia Nasionál Timor-Leste atu nafatin mantein estabilidade seguransa ba prosesu demokratizasaun iha ita nia rai,” dehan Komandante Armando Monteiro
Nia dehan, Ida ne’e mak situasaun espesífiku ne’ebe mak Komandu Jéral PNTL aktualiza atu nune’e liu husi media hodi Públika atu komunidade sira bele hatene.
Relasiona ba akontesimentu ne’ebe akontese iha semana rua kotuk ne’e, sai hanesan referensia no lisaun ida ba PNTL, tanba ne’e ohin Komandu Jéral PNTL orienta ona, atu reforsa Komandu PNTL munisípiu Dili relasiona ho finalidade prosesu kampaña ne’ebe mak sei konsentra iha dili. Atu nune’e ita hotu mantein nafatin ita nia estabilidade ba prosesu kampaña ida ne’e la’o ho di’ak.
