Reportajen Joselina dos Santos
Komandu Jéral Polísia Nasionál Timor-Leste (PNTL), rejistu kazu asidente no insidente tráfiku hamutuk ema nain tolu (3), inklui mos lakon membru PNTL ida, ne’ebe mak durante ne’e hala’o nia kna’ar hanesan seguransa iha Tribunal Distrital Dili, durante iha kampaña eleisaun Prezidensiál Períodu 2022-2027 nia laran.
Iha konferénsia imprensa Porta Vóz Komandu Jéral PNTL, Superintendente Xefe Polísia Armando Monteiro hateten Relasaun Públika Komandu Jéral Polisia Nasionál Timor-Leste (PNTL), atualiza situasaun seguransa jéral durante períodu kampaña, no eleisaun Prezidensiál ba segundu semana hahú dia 7 até 13 Fulan Marsu 2022 nian.
“Husi segundu semana ida ne’e, Komandu Jéral Polísia Nasionál Timor-Leste (PNTL), rejistu insidente no asidente espesífiku balun ne’ebe mak presiza aktualiza hodi nune’e públiku akompaña atu hatene,” dehan, orta Vóz Komandu Jéral PNTL, Supierentedente Xefi Polísia Armando Monteiro ba Jornalista sira iha Komunikadu Imprensa iha Salaun PNTL Kaikoli, 14/03.
Nia dehan husi insidente no asidente ne’ebe mak Komandu Jéral PNTL rejistu mak asidente tráfiku grave ema nain 3, asidente 2 iha Dili no ida iha Remexiu Aileu.
Aleinde mos iha asidente ne’e Komandu Jéral PNTL lakon nia membru ida ne’ebe mak durante 22 anos, dedika no sakrifika nia aan ba rai ida ne’e liu husi instituisaun Polisia Nasionál Timor-Leste, hala’o nia kna’ar hanesan seguransa iha Tribunal Distrital Dili, Husi Eskuadra Vera-Cruz Komanda PNTL Dili nian.
“Ita lakon ita nia sidadaun nain 2 ne’ebe mak lakon nia vida ne’e, motivu husi asidente hirak ne’e tanba laiha konsentrasaun bainhira konduz motorizada ho transposte iha Estrada Públiku,” nia dehan.
Nia hatutan, iha dia 7 até dia 13 ne’e mos Komandu Jéral PNTL, rejistu tan insidente nain rua iha dia 12 Marsu mais ou menus tuku 00.2h ba Kazu Omesidu grave ida iha Nunomoque Fatubliku Ainaro, husi akontesimentu ne’e Komandu PNTL Munisipiu Ainaro Liu husi servisu investigasaun kriminal to’o kedas iha fatin krime ho medidas polísia no kaptura kedas suspeitu ba Tribunal Distrital Suai hodi submete ba primeiru interrogatóriu.
Nia dehan, Kazu Ainaro ne’e akontese tanba motivu husi Ódiu vigansa pasadu nian, tanba ne’e vitima ho suspeitu iha problema antes, no vitima mos hetan akuzasaun kumpre nia devér hafoin sai husi prizaun no tenta provoka malu entaun vitima sai fali suspeitu ba kazu ódiu vingansa iha pasadu ne’e rasik.
