Reportajen Joanina Casamiro
Sekretária Estadu Formasaun Profisinál no Empregu (SEFOPE) halo enkontru ho Embaixadórór Japaun Tetsuya Kimura, hodi Ko’alia kona-ba asina akordu hodi lori Timoroan ba servisu iha Japaun.
Tuir Sekretária Estadu Formasaun Profisionál no Empregu (SEFOPE), Alarico Do Rosário hateten governu iha tempu badak nia laran, sei halo rekrutamentu ba Timoroan, atu ba servisu iha Japaun maibé ida ne’e la’os SEFOPE mesak maka halo servisu maibé sei liuhosi Ministériu Negósiu Estranjeiru no Kooperasaun (MNEK) no mós Ministériu Estranjeiru Japaun nian.
“SEFOPE no Ajénsia sira hamutuk mak bele halo buat ida ne’e, ita asina hanesan, halo implementasaun, ami prontu atu rekruta iha tinan ida ne’e nia laran,” Dehan Sekretariu Estadu Alarico ba jornalista sira iha Salaun SEFOPE kaikoli, Tersa 10/1.
Nia haktuir preparasaun atu servisu iha Japaun ne’e la fasil, tanba liu hosi prosesu rekrutamentu, katak prosesu ida governu halo akordu atu lori Timoroan ba servisu iha Japaun, maibé sira sei tuir formasaun hanesan estájiu.
“Ita ko’alia Kona-ba prepara ne’e la’os fasil, tanba liuhosi prosesu rekrutamentu katak prosesu ida ita halo akordu atu lori Timoroan ba servisu iha Japaun, no mós halo formasaun hanesan estájiu ida katak ba aprende, no mós iha parte balun bele halo servisu ba koñese di’ak liu tan, tanba iha tinan kotuk liu ba ami enkontru hamutuk ho sira Embaixadora sesante liu ba, prosesu ida ne’e la’o kleur ona iha tinan kotuk to’o agora, maibé atu tama ba final ona,” nia esplika.
Nia haktuir, ohin ko’alia atu lori númeru ki’ik mak ba uluk, maibé akordu entre governu ne’ebé seidauk asina, atu lori joven hosi Timor ba servisu iha ema nia rain, presiza buat mak tenke prenxe legal sira ne’e, ema hotu hatene hanesan Australia ho Korea la fasil hodi ba, maibé liuhosi prosesu naruk ida liu hosi akordu hanesan Korea no Australia ba Timoroan sira, bainhira hetan asidente mate ruma karik governu bele hatene, tanba ne’e mak prosesu sira ne’e la’o neineik.
Entretantu Embaixadórór Japaun, Tetsuya Kimura hateten, governu Japaun no Timor-Leste hahú halo diskusaun kona-ba kooperasaun, oinsá fasilita Timor oan sira ba servisu estaziadu iha Japaun. Programa ida ne’e fornese iha area sira hanesan Agrikultura, sira mos sei hetan formasaun hodi aumenta abilidade, liu-liu ba mudansa teknolojia iha Japaun, nune bainhira fila bele kontribui ba dezenvolve Timor-Leste
