Reportajen Adroaldo ‘Saretukau’
Kandidatu independente ba Prezidente Repúblika (PR), Virgílio da Silva Gutteres “Lamukan”, Segunda 28 Fevereiru, marka prezensa iha kanál GMNTV hodi prienxe programa 3 minutu hanesan direitu de antena hodi hato’o mensajen ba eleitór sira.
Kandidatu ho númeru sorteiu 12 iha program 3 minutu ne’e hato’o mensajen konabá tanba sá mak nia hakarak kandidata aan, tanba sá nia prontu atu kandidata aan no motivu saída mak nia hakarak kompete iha eleisaun prezidensiál períodu 2022-2027.
“Ba eleitór sira ha’u nia mensajen mak ne’e, tempu to’o ona atu hili kandidatu ida ne’ebé mak independente. Kandidatu ne’ebé partidu apoiu ne’e ita hili tiha ona, sira ne’ebé ema tula liman ne’e mos ita hili tiha ona, ita hatene saída mak sira halo, ne’ebé agora tempu to’o ona para ita atu hili kandidatu independente ne’ebé ke ba la iha interese buat ida, maibé ba interese nasaun nian, ba interese povu nian,” hato’o Virgílio.
Entretantu kandidatu independente ne’e sei hahú nia kampaña abertura 2 Marsu, iha rai ketan Oekusi hamutuk ho povu Oe-cusse oan sira durante loron rua nia laran, hafoin ne’e kontinua hikas nia kampaña eleitorál iha munisípiu Baukau.
