Reportazen Santina Lucia da Costa
Iha ambitu komemorasaun loron mundial ba Direitus Umanus no selebra tinan 24 Premiu Nobel da Paz ne’ebe Dr. Jose Ramos Horta ni Amo Bispo Dom Carlos Filipe mos simu iha tinan 1996, ho ida ne’e Asosiasaun dos Combatentes Brigada Negra (ACBN) hamutuk ho Movimentu Brigada Xanana no Movimentu Patriotismu Defende CRDTL no Profisionais sira, organiza seminariu nasional ho tema “Tinan 24 Prémio Nobel da Paz no Komprimisiu Timor-Leste, atu harii Estadu Direitu Demokratika ne’ebe Respeita Konstituisaun no Direitus Umanus”.
Iha seminariu refere Diplomata Senior Timor-Leste, Jose Luis Guterres “Lugu” hateten iha tinan 24 liu ba Amo Bispo Dom. Carlos Ximenes Belo no Dr. Jose Ramos Horta simu Nobel da Paz, ida ne’e hanesan projeta imajen Timor nian ba iha mundu tomak, ida ne’e eventu ida di’ak tebes.
Jose Luis Guterres dehan ohin loron jerasaun foun sira mai rona tanba sa mak ita simu Nobel da Paz rua kedas no saida los mak ita halo, para bele kontinua nafatin presta omenajen ba ita nia maun sira, ne’ebe mak simu no mos saida mak ita halo iha prosesu demokratizasaun, iha direitus uumanus iha ita nia rai laran, iha konstituisaun bele hanesan kontinua nafatin hahi no serbi.
Nia dehan jerasaun foun labele haluha fali kontribuisaun boot ne’ebe ita nia igreja fó, Madre, katekista, padre sira fo, se ita la valoriza ida ne’e, difisil teb-tebes ita atu ba tuir dalan los.
Iha fatin hanesan Sekretariu Jeral Asosiasaun Combatentes Brigada Negra, Rui Lorenço da Costa, hateten nu’udar movimentu siviku ida atu responde ba situasaun atual, ita hahu ita nia lideransa sira hahu hakat liu konstituisaun, ho nune’e ita hakarak fó hanoin ba hotu-hotu katak, importante tebes tau konstituisaun hanesan mahon ba ita hotu-hotu, atu nune’e ita bele lao.
“Ami mos konsentra estudante universitariu sira, tanba ho ida ne’e bele inspira sira, komemorasaun 24 anos ne’e fo hatudu katak, ita iha duni lideransa mak ho integridade forte ho influensia valores ka vertude kulturais, relijiosas Timor nian hanesan igreja katolika, atu bele lidera funu ne’e ho di’ak no integridade ho ida ne’e bele inspira mos ita nia joven sira hotu, ne’ebe mak partisipa iha ne’e, atu bele sai futuru lideransa ne’ebe mak di’ak nakonu ho vertude, ho ida ne’e mak ita harii paz, unidade no prosperidade”, dehan Rui Lorenço da Costa.
Palestrante ba seminariu nasional refere mak Dr. Jose Ramos Horta, Amo Domingos Maubere, Amo Martinho Gusmão, Dr. Jose Luis Guterres “Lugu”, Dr. Avelino Coelho no partisipantes ba seminariu mai hosi estudante Universitariu sira no Sosiedade Sivil
