Reportajen Umbelina dos Reis
Komisaun Nasional Eleisoens (CNE) halo sorumutu ho líder Partidu Polítiku konkorrente Eleisaun Parlamentár 2023, hodi ko’alia konabá preparasaun foti númeru sorteiu ba “Programa Debate Partidu Polítiku” ne’ebé sei monu iha loron 27 no 28 Abríl, 2023.
Prezidente CNE, Jose Agostinho da Costa Belo hateten CNE oferese tan palku importante ida ba partidu polítiku sira. Debate públiku ne’e sei partisipa hosi lideransa sira espesiál, juventude no juventude feto, li-liu ba sira ne’ebé kandidatu naran iha lista, nune’e sira bele hetan oportunidade ko’alia programa partidu polítiku nian.
“Tanba ko’alia konaba tranzisaun jerasional ba dezenvolvimentu nasionál faz parte ba juventude feto sira, tanba ne’e mak debate ne’e sei diferente ho debate sira ida uluk,” dehan Prezidente CNE Jose Belo ba jornalista sira iha Salaun Laline Larigutu, 25/04.
Alein de ne’e CNE halo peskiza, maioria feto mak domina, tanba juventude sai hanesan kestaun ida ba nesesidade konseitu hodi kontribui ba rai ida ne’e, entaun presiza liu hosi kanál debate, nune’e audénsia sira bele asiste hotu. Nune’e eleitór sira hili karik, ida ne’e sai hanesan kometimentu ba joven sira.
