Reportajen Joselina dos Santos
Uniaun Europeia (UE), hasoru malu ho Porta Voz Partidu Conselho Nacional Resistência Tomor (CNRT), hodi ko’alia kona-ba misaun prosesu analiza Jurídiku ba prosesu eleisaun parlamentar nian, maibé la’os hanesan observasaun internasionál.
Porta Voz Partidu CNRT Tomás Cabral hateten Uniaun Europeia (UE), la’os misaun ne’ebé bain-bain uluk ne’e, agora hanesan misaun observasaun ne’ebé boot, maibé iha situasaun eleisaun Prezidensial ne’e sira iha rekomendasaun lubuk ida atu kumpri, maibé la tau konsiderasaun entaun sira nia misaun ida agora ne’e ki’ik ba ema nain-rua, atu halo análize ba prosesu analiza jurídiku no analiza prosesu hotu.
“UE sei ba iha CNE-STAE hodi ko’alia ho governu atu prosesu ne’e imparsiál no mós sei servisu hamutuk ho misaun observasaun sira seluk. Ami ohin diskute malu katak sira sei servisu liu ba misaun observadór CPLP, tanba Portugal mós membru husi UE nian, signifika ho sira nia prezensa ne’ebé ki’ik ne’e hatudu katak, iha buat balun mak ita la kumpre tanba UE ne’e parseria ho Timor-Leste liu-liu ba dezenvolvimentu rural”, Dehan, Porta Voz Tomás Cabral ba Neon Metin iha Sede CNRT Bairro dos Grilhos, tersa 25/04.
Nia haktuir Uniaun Europeia uluk mai ho misaun boot, maibé agora sira komesa reduz nia misaun observadór ba ekipa ida ema na’in-rua, atu halo analiza ba prosesu ne’e, no analiza ba implementasaun, signifika CNE-STAE koko tenta servisu didi’ak ho imparsialidade, atu labele lakon konfiansa. Tanba Timor nia governasaun la imparsiál ba aktus ne’e, mak sira mai ho funsaun tekniku ne’e duni sira nia observasaun sei foka liu ba CPLP.
“UE mai iha partidu CNRT tanba ha’u hatene prosesu ne’e loloos, tanba sira haruka rekomendasaun ba Prezidente iha eleisaun Prezidensiál katak labele muda lei antes 6 meses antes eleisaun, sentru paralelu ema barak la vota iha prosesu ne’e iha intervensaun politika boot liu. Nune’e ohin ha’u husu ba sira hodi servisu ho CPLP atu Timor-Leste mantein katak aktu Eleitóral Timor-Leste ne’e diak liu iha Ázia no iha CPLP”, nia informa.
Nune’e sira mai laos hanesan misaun observasaun, maibé sira mai atu halo levantamentu hodi hakerek sira sei la halo komunikadu Imprensa, tanba ne’e ohin sira lakohi koalia maibé sei halo Anotasaun deit.
