Reportajen David da Costa
Polemika kandidatu kadetes foun ba Ajentes Polísia Nasionál Timor-Leste (PNTL), ohin liu husi reuniaun konsellu Ministru governu deside halo suspensaun temporária no governu sei halo re-estruturasaun komisaun verefikasaun husi Nasional no Internasional atu halo revizaun ba iha konkursu ne’e durante loron rua nolu.
Ministru Interiór (MI) Francisco da Costa Guterres, hatete, Depois rona hotu reklamasoen oioin husi kadete foun PNTL, MI lori mai iha konsellu Ministru tanba abertura konkursu ne’e KM maka aprova, tanba ne’e tenke lori fali bai ha KM para husu KM nia autorizasaun para bele foti dezisaun kona-ba polemika kadetes foun ne’e.
“Tanba ne’e, ohin ami mai aprezenta iha Konsellu Ministru, no Konsellu Ministru deside katak ita supende tiha lai konkursu ne’e rasik, tanba ita presiza halo uluk averiguasaun no halo uluk analiza haree didi’ak fila fali maka foin bele anusia rezultadu ne’e,” dehan Ministru Interiór (MI) Francisco da Costa Guterres, ba jornalista sira iha palasiu Governu, Kurta 11/02.
Tanba ne’e, Governu hakarak asegura transparénsia, legalidade, no kredibilidade iha prosesu rekrutamentu, hodi konsidera dúvida no preokupasaun sira ne’ebé hato’o hosi kandidatu sira no entidade oioin kona-ba kumprimentu ba rekizitu balun no regularidade iha faze konkursu nian. Ba ida-ne’e, Rezolusaun Governu prevee suspensaun temporária ba konkursu no reforsa mekanizmu supervizaun no
Nune’e mos Konsellu Ministru determina atu halo re-estruturasaun ba Komisaun Monitorizasaun no Fiskalizasaun nian, liuhusi integra membru nasionál no internasionál independente sira, nune’e mós halo revizaun klean ba faze hotu-hotu hosi prosesu selesaun nian, ho nia objetivu atu hatene loloos faktus no potensialmente adota medidas koretivas.
Ho prosedimentu ida ne’e, governu iha intensaun atu hametin sidadaun sira nia konfiansa iha instituisoins públikas no atu garante katak asesu ba Polísia Nasionál Timor-Leste ne’e hala’o ho justu, imparsiál, no tuir lei.
“KM mos deside re-estruturasaun komisaun verefikasaun i supervizaun ida ne’ebe sei kompostu husi entidade oioin no horsida ita inklui tan mos ema internasional balun GNR Portugal no Australia ho tan ema balun ne’ebe maka di’ak para ita fó servisu ba sira loron rua nulu (20) para atu halo revizain tomak ba prosesu konkursu ne’e rasik,” nia subliña.
Nia afirma “Depois maka ita haree, sira sei iha loron rua nolu para rekomenda mai hau para hato’o ba iha KM katak kona-ba medida saida maka ita bele foti, sei hetan problema ruma ita bele halo revizaun total ba ida ne’e ou ita bele halo fila fali parsialmente kunkursu ne’e rasik hodi la’o para nia prosesu ne’e la’o ho di’ak,”
Entertantu iha loron tolu fulan Febreiru 2026 liuhusi Komisaun Rekrutamentu PNTL públika lista jeral kandidatu foun ho total rihun sanulu resin rua atus ualu hitu nulu resin haat (12.874). Husi númeru ne’e, iha kandidatu rihun sanulu atus lima sia nulu resin hitu (10.597) mak aprovadu no kandidatu rihun rua atus rua hitu nulu resin hitu (2.277) mak la aprovadu. Maibé husi numeru aprovadu ne’e fó prioridade ba kandidatu atus haat (400) ne’ebé tuir kouta kada munisipiu mak sei ba teste médiku.