Reportajen David da Costa
Relasiona ekipamentu reajente ne’ebé maka halo teste saude hanesan CBC Kimia no Serolojia iha Laboratorio Nasional Ospital Nasional Guido Valadares (HNGV) ba kadetes foun Polisia Nasional Timor-Leste (PNTL) hamutuk 400 ne’ebé maka laiha, Ministra Saúde (MS) konsidera ida ne’e informasaun la loos.
Ministra Saúde (MS) Elia A.A. dos Reis Amaral, hatete kona-ba ekipamentu reajente atu halo teste hanesan CBC Kimia no Serolojia iha Laboratorio Nasional Ospital Nasional Guido Valadares (HNGV) reajente ne’ebé maka atu uza hodi hala’o teste mediku ba kadetes foun PNTL laiha ne’e informasaun laloos.
Tanba iha Laboratori Nasional Ospital Nasional Guido Valadares iha reajente ne’ebé maka iha atu halo tratamentu ba se de’it maka bainhira ba halo tratamentu iha HNGV sempre halo atendimentu. Maibé dehan laiha ne’e husu tok fali ba Ministru Interiór.
“Reajente laiha depois ita konfirma ho Ministru Interior. Ita hatene katak iha HNGV iha tratamentu ne’ebe ita boot sira ba ita presiza halo, maibé reajente laiha ne’e hau hanoin la loos karik, ne’e informasaun laloos, buat sira ne’e presiza konfirma fila fali,” dehan Ministra Saúde Elia Amaral ba Jornalista sira iha Palásiu Governu, Kuarta 11/02.
Entretantu antes ne’e, portavoz Komisaun Rekrutamentu Suprentidente ba kadetes Foun PNTL, Suprentidente Polisia Antonio da Luz, hatete, komisaun rekrutamentu seidauk bele halo teste mediku ba kadetes foun ne’ebe aptu hamutuk 400 atu tuir teste mediku, tanba fasilidade reajente dadaun seidauk iha.
Tanba ne’e, komisaun rekrutamentu sei hein fali ekipamentu sira ne’e atu to’o ona mak foin bele halo teste ba kadetes foun PNTL ne’ebe maka aprovadu ba teste mediku nian. Loloos ne’e kandidatu sira ne’e halo teste iha loron 10 fevereiro ne’e maibé reajente laiha.
“Hanesan semana kotuk fó sai ona ba publiku katak dia 10 sei halo teste mediku ba kandidatu sira ne’ebe aptu 400 pesoas ne’e, maibé depois departamentu saude halo koordenasaun saude ho Laboratorio Nasional HNGV ba konfirma katak ekipamentu ne’ebe atu teste hanesan reajente to’o agora seidauk iha,” dehan Portavoz Komisaun Rekrutamentu Suprentidente Polisia Antonio da Luz liuhusi konferensia imprensa iha CFP Comoro, 9/02.
Iha biban ida ne’e, Komisaun rekrutamentu infroma ba publiku, liuliu ba kadidatu kadetes foun PNTL sira hotu atu bele hein to’o ekipamentu ne’e to’o ona maka komisaun rekrutamentu sei konfirma fila fali atu bele mai tuir teste saude nian.
Entertantu iha loron tolu fulan Febreiru 2026 liuhusi Komisaun Rekrutamentu PNTL públika lista jeral kandidatu foun ho total rihun sanulu resin rua atus ualu hitu nulu resin haat (12.874). Husi númeru ne’e, iha kandidatu rihun sanulu atus lima sia nulu resin hitu (10.597) mak aprovadu no kandidatu rihun rua atus rua hitu nulu resin hitu (2.277) mak la aprovadu. Maibé husi numeru aprovadu ne’e fó prioridade ba kandidatu atus haat (400) ne’ebé tuir kouta kada munisipiu mak sei ba teste médiku.
