Reportajen Silvino Freitas
Komandu Polisia Nasional Timor Leste (PNTL) munisipiu Lautem rejista ona kazu omisidiu agravado liuhusi asaltu malu neebe akontese iha aldeia Poros suku Mehara postu administrativu Lospalos munisipiu Lautem ho numeiru NUC:0028/26.Lasic no sei aprezenta ba ministeriu publiku munisipiu Baucau, kazu asaltu malu nee rezulta joven ida lakon vida no ida kanek ba kazu refere polisia detein ona joven nain 10 inklui membru Falintil-Forsa Defeza Timor Leste (F-FDTL) nain ida.
Portavoz PNTL Suprendidenti Xefe Policía, Joao Belo dos Reis dehan, kazu neebe akontese iha iha aldeia Poros suku Mehara neebe rezulta joven Vincensiu de Jesus Fernandes lakon vida no joven Rivaldo Caetano Lopes neebe hetan kanek, neebe iha kazu nee iha grupu rua ida mai husi suku Asalaino neebe ba fatin serimonia familia nian iha suku mehara aldeia poros, akontesimentu problema refere maka rezulta joven ida lakon vida nunee parte polisia halo kedas atuasaun hodi kaptura kedas ema nain 12 iha fatin akontesimentu.
“polisia mos halo kedas koordenasaun ho parte F-FDTL tanba deskonfia autor sira neebe ba asalta iha fatin serimonia nee iha mos element F-FDTL balun, polisia mos halo kedas operasaun hodi kaptura ema nain 12 iha momentu neeba” dehan Portavoz PNTL Suprendidenti Asistente Joao Belo dos Reis ba jornalista sira iha komandu jeral Kaikoli, (11/05).
Nia dehan tan, kazu neebe akontese iha Mehara Lospalos husi parte polisia rejista ona ba iha ministeriu publiku ho numeiru NUC:0028/26.Lasic, husi kazu refere polisia promove ona ba omisidiu agravadu tanba kabe ba artigu 140, 185, 146, 145 no 260 neebe hamate ema iha fatin akontesimentu, tanba nee husi kazu neebe involve ofisial FDTL nain ida maibe laiha separasaun ba instituisaun tanba membru neebe involve iha asaun konsidera hanesan sidadaun bainbain no aprezenta ba ministeriu publiku hanesan sidadaun komun.
“ita nia koordenasaun ho parte FDTL lao nafatin saida mak nia halo laiha ligasaun ba nia kanaar hanesan membru FDTL tanba nee prosesu hotu hotu rejista ona ba numeiru NUC espera ohin sira submete ba ministeriu publiku Baucau” Portavoz PNTL Suprendidenti Asistente Joao Belo dos Reis.
Nia konklui, kronolojia husi kazu Mehara nee deskonfia husi arte marsial tanba grupu neebe mai husi asalaino nee ho backrground husi arte marsial, nunee too dadaun nee fatin akontesimentu situasaun kontroladu tanba hetan koolaborasaun ho autoridade lokal joven no seguransa F-FDTL sira neebe apoia halo seguransa, nunee mate isin joven nain ida dadaun nee iha ona prosesu autopsia hodi hatene nia kronolojia no sei entrega ba familia iha tempu badak, nunee autor neebe dadaun nee hetan ona kapturasaun ho inisial LRH, GDSB, MDS, MF, MB, HF, RF, MG, IDC no LP inklui membru F-FDTL ida.